Ахсынньы 15 күнүгэр Саха успуордун национальнай көрүҥнэригэр «Сахаада-спорт» ассоциация 2023 сыл бастыҥ спортсменнарын «Триумф» баараҕай уораҕайыгар чиэстээтэ.
«Бастыҥ спортсмен» (хотугу многоборьеҕа: наарта ыстаныы, аркаан, сүгэ быраҕыы) Арассыыйа 5-с төгүллээх чемпиона, биир дойдулаахпыт Алексей Созонов аата ааттанна. Уолбутун өссө биир чаҕылхай кыайыытынан эҕэрдэлиибит, ситиһиини, санаа хоту табыллыыны баҕарабыт!
Ону тэҥэ, сыл түмүгүнэн «Бастыҥ тренер» үрдүк аат, биһиги биир дойдулаахпыт Егор Кудриҥҥа иҥэрилиннэ. Кини дьарыктыыр уола, аан дойду чөмпүйүөнэ Константин Жирков мас тардыһыытыгар «Сахаада-спорт» ассоциация 2023 сыллааҕы Лауреатынан буолла.
Егор Петрович бастыҥ спортсменнары дьарыктыыр,уһуйан таһаарар, айылҕаттан дьоҕурдаах тренер, киэн туттар, холобур буолар, төрөөбүт улууһун ОЛИМП чыпчаалыгар бастакынан ааттаппыт спортсмеммытынан буолар.
Ааптар: Оксана Слепцова
Хаартыска: Сыл бастыҥ спортсменнара / интэриниэт ситимиттэн