Россияҕа Дьиэ кэргэн, Саха сиригэр Оҕо саас сылларыгар, Саха сиригэр Ийэ күнүгэр анаан нэһилиэкпитигэр «Күн күбэй ийэ эрэллээх уолунаан» куонкурус буолла. Манна 3,4,7,8,9 кылаастартан уолаттар ийэлэриниин кытыннылар. Күрэхтэһии 6 түһүмэҕинэн ааста.
Манна бэйэни билиһиннэрии, төрүччүнү уол кэпсиирэ, ийэ балыктан астаабыт бүлүүдэтин көмүскээһинэ, «Ийэҕин төһө билэҕин?» ыйытыктар, талааны көрдөрүү, биир истииллээх таҥаһы кэтэн көрдөрүү киирдилэр.
Кыттааччылар бары ох курдук оҥостон кыттыбыттара, көрөөччүлэр биир тыынынан сэҥээрэ көрдүбүт. Түһүмэхтэр быыстарыгар оҕолор эҕэрдэ нүөмэрдэрэ, Бубякина М.В., Созонова М.С. ырыалара тэрээһини киэргэттилэр.
Дьүүллүүр сүбэ кыттааччыларга түһүмэх аайы кыайыылааҕы таһааран, анал ааттары анаан туран, добун суруктары өйдөбүнньүк бэлэхтэри туттартаата. Кылаан кыайыылаах аатын 4-үс кылаас үөрэнээччитэ Байдам Винокуров ийэтэ Елена Тимофеевналыын ыллылар, оттон «Көрөөччү биһирэбилин» 8-ыс кылаас үөрэнээччитэ Игнат Винокуров ийэтэ Вера Петровналыын ылан үөрдүлэр.
Бары кыттааччыларга кылаас салайааччылара харчынан сертификаттары бэлэхтээтилэр. Бу биир бэртээхэй киэһэ дьиэ кэргэни өссө күүскэ сомоҕолоон, хас биирдиилэригэр умнуллубат кэрэ өйдөбүл буолан хаалыа.
Ааптар: Изабелла Ноговицына