Ханнык да кэмҥэ, ханна даҕаны киһи хараҕын үөрдэр, сүргэтин көтөҕөр кэрэ көстүүлэр баар буолаллар. Ол айылҕа кэрэ көстүүтэ, киһи оҥорон таһаарбыт, айбыт – туппут айымньыта да буо- луон сөп.
Киэҥ сирдэринэн сылдьан кэллэххэ биһиги улууспут киинэ, Орто Халыма куораппыт барахсан олус хобдох көстүүлээх. Мин куһаҕан диэн эппэппин. Куоракка бара-кэлэ сылдьан куруук төбөм иһиттэн «хайдах гынан сэргэхситиэххэ сөбүй?», «хайдах тупсарыахха?», «тугу гыммыт киһии…» диэн санаалар куруутун үүйэ-хаайа туталлар.
Куораппыт тутуулара үгүс өттө кырдьан, эргэрэн туралларын бары көрөбүт, билэбит. Бу икки этээстээх уопсай дьиэлэри көрүҥнэрин тупсараары, сорох дьиэлэргэ улуус биллиилээх дьонун мэтириэттэрэ, ааттара-суоллара суруллубут баннердара ыйаммыта олус үчүгэй. Мин саныахпар, бу дьиэлэри тупсарар өссө биир суол баар. Дьокуускай куоракка кэнники кэмҥэ «мурал» диэн дьиэлэргэ ойуулары уруһуйдааһын ньымата баар буолбут. Сахабыт сирин киинигэр сахалыы куттаах, олоҥхону сырдатар ис хоһоонноох ойуулар элбээбиттэр. Бииртэн биир ураты, сороҕо философскай иэйиинэн куустарбыт айымньылары көрөр наһаа астык, дии саныыбын.
Улууспутугар сахалыы куту сайыннара, дойдуларыгар бэриниилээх буолууну уһугуннара, олоҥхобут ыһыаҕар түбэһиннэрэ сахалыы санаалаах, сахалыы тыыннаах мураллары ойуулааһын наада. Мурал эскииһин толкуйдааһыҥҥа улууска Орто Халыма олоҥхолорун сюжетынан, уһук хотугу улуус буолар уратыбытын сырдатар тиэмэлээх куонкурус биллэриэххэ сөп. Онтон табыллыбыттары талан, ол эскииһинэн уруһуйдатыахха.
Үйэлээх кэрэ көстүүнэн кырдьаҕас куораппытын тупсарыахха!
Ааптар Изабелла Ноговицына