Пионерия тэриллибитэ 100 сыллаах үбүлүөйүнэн, Иккис Хаҥалас нэһилиэгин бэтэрээннэрин Сэбиэтин көҕүлээһининэн (салайааччы Светлана Ивановна Слепцова) бэлиэ тэрээһин ыытыллынна.
Көлүөнэлэр саастарынан арахсан этэрээт тэринэн маршировканан киирдилэр, уруккулуу барабаан охсон Знамя киллэрэн, рапорт этэн, уот кутаатын тула пионерскай ырыа ыллаатылар.
Орто Халымаҕа 1962 сыл бастакы пионерскай сүлүөт кыттыылаахтара Надежда Иннокентьевна Макарова, Владимир Михайлович Слепцов, «Артек» лааҕыр кыттыылааҕа Евдокия Даниловна Ефимова, бастыҥ үөрэнээччи Якутскай куорат «Энергетик» лааҕыр кыттыылааҕа Людмила Ивановна Никитина ахтыыларын кэпсээтилэр, эҕэрдэ тыл эттилэр.
Кэрэхсибиллээҕинэн, нэһилиэк кырдьаҕастарыттан Матрена Николаевна Слепцова «Урут мин эмиэ пионер этим»- диэн кыһыл хаалтыс баанан кыттыыны ылан дьон сэргэ көҕүн тарта.
Бу ааспыт көлүөнэ ыччат оҕо эрдэҕиттэн үөрэххэ, үлэҕэ бэриниилээх буолан улаатан билигин да барытыгар актыыбынай буоларбытын көрдөрөр.
Людмила Никитина, Эбээх бөһ.