Сиккиэр тыал сипсийэр тылларын,
Хомоҕой хоһооммор холбуоҕум,
Сибэкки арааһын сэрэнэн,
Кыл сапка тиһэммин бэлэхтиэм.
Аламай күн сырылас куйааһын,
Дууһабар кистээммин бүөбэйдиэм,
Бэс ыйын сандаархай түүннэрин
Түү былаат оҥостон бүрүнүөм.
Бу кэрэ тылларынан, РСФСР норуотун үөрэхтээһинин туйгуна, Учууталлар учууталлара, «Барҕарыы» фонд стипендиата, РФ үтүөлээх учуутала, үлэ, спорт ветерана, «Сайар сарыал», «Тыл сүмэтэ» Саха сирин прозаиктарын уонна хоһоонньуттарын региональнай общественнай «Айар кут» холбоһуктарын чилиэнэ, улуустааҕы, өрөспүүбүлүкэтээҕи уус-уран ааҕыылар, төрөөбүт тыл уонна сурук-бичик күнүгэр аналлаах ааҕыылар хас да төгүллээх кылаан кыайыылаахтара Александра Васильевна Гуляева «Күнтэн күүс ылан» иккис кинигэтин сүрэхтэниитин дьоро киэһэтэ саҕалананна.
Онон бу киэһэ литература, уус-уран ааҕыы, хоһоону истии иэйиилэрин кынаттаах атыгар олорсон хас биирдиибит хоһоон хонуутунан айаннаатыбыт.
Хомуурунньук уопсайа 10 түһүмэхтэн турар. Манна 50 хоһоон киирбит. Бары тус туһунан тиэмэлээхтэр. Аргыый аҕай кинигэбитин арыйан истэххэ:
1-кы түһүмэх аата — Сыл кэмнэрэ. Бу түһүмэххэ 11 хоһоон киирбит, бэлиэтии көрдөххө, күһүнү туойар хоһооннор элбэхтэр эбит.
Үлэлииллэр — кыайалларынан,
Оҥороллор-сатыылларынан
Ийэ дойдум баайын-дуолун…
Үлэ дьоно үрдэппитэ… диэн тылларынан саҕаламмыт 2-ис түһүмэххэ, үлэни өрө тутар ис хоһоонноох айымньылар түмүллүбүттэр.
Олохпор кынатым куорсуна,
Бу манна, бу дьиэҕэ үүммүтэ.
Оҕо саас уйата – оскуола,
Хаһан да сааһырбат, кырдьыбат…
Үһүс түһүмэххэ киирбит «Үлэлээбит кэлэктииппэр» диэн хоһоону таабырын гынан таайдыбыт.
Дойдуттан тэйэ сылдьан,
Билэр дьоҥҥун көрдүүгүн.
Саатар биирдэ көрсүһэн,
Кэпсэтиэххин баҕараҕын…
Дойду ахтылҕана диэн ааттаах 4-үс түһүмэххэ киирбит хоһооннорго дойдуга муҥура суох таптал иэйиитэ иһиллэр.
Александра Васильевна «Сэрии кэмин оҕото» буоларынан, бу темаҕа сыһыаннаах хоһоонноро хомуурунньук 5-ис түһүмэҕэр түмүллүбүттэр.
«Маннык буолта дуу!»… диэн тылларынан саҕаланар 6-ыс түһүмэххэ көрүдьүөстээх хоһооннор, үгэлэр киирбиттэр. 7-ис түһүмэххэ киирбит сулустар туһунан хоһооннор туспа уратылаахтар.
Александра Васильевна 36 сыл устата кэлэр кэнчээри ыччаты үөрэппит, ииппит учууталлар учууталлара буолар. Онон оҕолорго анаан суруйбут хоһоонноро хомуурунньук 8-ыс түһүмэҕэр киирбиттэр.
Кинигэ 9-с түһүмэҕэр анабыл хоһооннор түмүллүбүттэр. Манна Халыма чаҕылхай дьонугар академик Роббекка, Халыма күөрэгэйэ Нина Созоноваҕа, саха уһулуччулаах чулуу суруйааччытыгар Ойуунускайга о.д.а. улуу дьоҥҥо анаммыт хоһооннор бааллар.
Алекасандра Васильевна уран тарбахтаах иистэнньэҥ буолар. Кини тутан-хабан тикпит, баайбыт, тиспит, араастык мындырдаан аттарбыт оҥоһуктарынан быыстапкаларга кыттан кыайыы көтөллөнөр, ситиһии ситиилэнэр. Хомуурунньугу түмүктүүр 10-ус түһүмэххэ киирбит «Сахалыы сонноох далбардар» диэн хоһооно ону туоһулуу айыллыбыт.
Дьэ маннык баай ис хоһоонноох кыракый хомуурунньук күн сирин көрбүт бэлиэ түгэнин ааптар 80 сааһын томточчу туолар үбүлүөйдээх күнүгэр сөп түбэһиннэрэ бэлиэтээтибит.
Түһүмэх аайы киирбит хоһооннортон сорҕотун ыраах Дьокуускайтан куйаар ситимин нөҥүө, сорохторун оскуола оҕолорун видеопоэзияларынан, сорохторун ыҥырыылаах ыалдьыттар иэйиилээх ааҕыыларыгар биһирии иһиттибит.
Ыаллыы сытар Эбээх бөһүөлэгиттэн Александра Васильевна балтылара, аймахтара кэлэн ыллам ырыанан киэһэни киэргэттилэр.
Маннык барытыгар дэгиттэр талааннаах киһибит бэлиэ күннэрин чэрчитинэн, дьонун-сэргэтин иннигэр «I Хаҥалас нэһилиэгин Бочуоттаах олохтооҕо», ОртоХалыма үөрэҕириитин салаатыттан «Орто Халыма улууһун үөрэҕириитигэр кылаатын иһин» диэн анал бэлиэлэринэн наҕараадаланна.
Элбэх эҕэрдэ этилиннэ, бастыҥ баҕа санаа ананна.
Ааптар: Изабелла Ноговицына, Өлөөкө-Күөл б.