Бэс ыйын 30 күнүттэн «Азия оҕолоро» спортивнай бэстибээл чэрчитинэн «Триумф» успуорт уораҕайыгар көҥүл уонна греко-римскэй тустуу турнирдара ыытылыннылар.
Манна 35 киилэттэн 92 киилэҕэ диэри ыйааһыннаах үрдүк сүүмэрдээһини ааспыт эдэр бөҕөстөр кииристилэр.
Тустуу, биһиги улууспутугар биир бас-көс туттар успуорт көрүҥүн биирдэстэрэ буоларынан бу турнирга сылдьан анааран көрдүбүт.
Көҥүл тустуу греко-римскэй тустууттан туох уратылааҕый? Бу көрүҥнэри хайа омук оҕолоро баһылыыр эбиттэрий?
Турнир үс (А,В,С) көбүөрүнэн биир тэҥ ыытылынна.
Көҥүл тустуу маҥнайгы күнүгэр Орто Халыматтан төрүттээх, билигин Мэҥэ Хаҥалас улууһун И.Г.Игнатьев аатынан Харатааҕы орто спортивнай оскуолатын иитиллээччитэ Слава Лаптев кыттыыны ылла.
Слава төрөөбүт дойдутугар, Орто Халыма куоратын «Боотур» оҕо спортивнай оскуолатыгар көҥүл тустууга 1-кы кылаастан С.Г.Ефимовка, В.П.Степановка уһуйуллубута.
Улуус масштабын толорду баһылаабыт уоланы өрөспүүбүлүкэ таһымнаах оҕо успуордун оскуолатыгар тириэньэрдэрэ мэктиэлээһиннэринэн үөрэнэ барбыта.
Кини оскуолатыгар сүүмэрдээһини ааһан, бу «Азия оҕолоро» бэстибээлгэ 41 киилэ ыйааһыҥҥа, Дальнай уокурук бөҕөһүн кытта киирсэн холонон көрдө. Славаны, тириэньэрдэрин, төрөппүттэрин, Олимпийскай таһымнаах турнир көбүөрүгэр үктэммитинэн эҕэрдэлиибит!
Бу саҕалааһына үрдүк үктэллэргэ сирдьит буоллун.
Бастыҥтан бастыҥы быһаарар түһүмэхтэргэ Саха сирин икки хамаандата, Казахстан, Азербайджан, Кыргызтан, Белорусь, Армения, Корея, Таджикистан, Узбекистан, Сирия, Арассыыйа араас уокуругун бөҕөстөрө таҕыстылар.
Греко-римскэй турнир көҥүл тустууттан уратыта диэн, илии күүһүнэн киирсии эбит, ол курдук утарылаһааччыҥ курданарыттан аллараа атахха киирбэккин, сис уонна илии үлэлиир успуорда эбит.
Дьэ оҕолор ыла-ыла тамнаһан сүрдээхтэр, холоруктуу эргийэн, хамсаныылара түргэнэ-сымсата, көрөргө астык.
Казахстан ыалдьааччы кыргыттарын кытта билсистим. Кинилэр уолаттара бастыҥнар истэригэр сылдьаллар эбит, ыйааһын аайы бөҕөстөрдөөхпүт диэн сэһэргээтилэр.
Санатан эттэххэ «Азия оҕолоро» норуоттар икки ардыларынааҕы оонньууларга Казахстантан саамай элбэх, 280 кыттааччы кэлбитэ.
Ааптар: Саргылана Кокорина
Хаартыска ааптара: Слава Лаптев