А.Е.Кулаковскай аатынан Норуоттар доҕордоһууларын дьиэтэ «Кыайыы ыччаттара» диэн өрөспүүбүлүкэтээҕи онлайн ааптарыскай патриотическай ырыа күрэҕин ыытта.
Бу тэрээһин СӨ култууратын министиэристибэтэ уонна «СӨ ырыа ааптардарын сойууһа» өрөспүүбүлүкэ уопсастыбаннай тэрилтэ өйөбүллэринэн тэрилиннэ.
Куонкурус сыала-соруга – үүнэр көлүөнэни патриотическай өйгө-санааҕа иитии, анал байыаннай дьайыы кыттыылаахтарын, дьоруойдарын хорсун быһыыларыгар дириҥ убаастабылы ааптарыскай патриотическай ырыа нөҥүө тиэрдии. Ону тэҥэ фронт уонна тыыл икки ардыгар ыкса сибээһи ускуустуба нөҥүө бигэргэтии.
Ырыа куттаах айымньылаах күрэххэ 24 ааптар кытынна. Хас биирдии кыттааччы айымньыта Ийэ дойдуга эрэллээх, бэриниилээх буолууну, дириҥ тапталы уонна туохтан да толлубат, чаҕыйбат күүстээх санааны кэрэһэлиир.
Дьүүллүүр сүбэ састаабыгар СӨ култууратын уонна ускуустубатын үтүөлээх диэйэтэллэрэ Николай Алексеевич Михеев, хампаһыытар, Саха сирин хампаһыытардарын Сойууһун бэрэссэдээтэлэ, Ольга Андреевна Янцен, Алексей Михайлов аатынан өрөспүүбүлүкэтээҕи литературнай бириэмийэ Лауреата, Николай Алексеевич Слепцов, СӨ ырыа айааччыларын Сойууһун чилиэнэ үлэлээтилэр. Хас биирдии дьүүллүүр сүбэ чилиэнэ куонкуруска киирбит ырыалары анал ирдэбилинэн көрөн сыаналаата. Манна ырыа муусукатын тыла, ырыа тылларын дириҥ суолтата, куонкурус сүрүн ирдэбилинэн патриотизмҥа эппиэттиир ис хоһоонун көрдүлэр.
Биһиги улууспутуттан олохтоох мэлэдьиис, 40-ча ырыа ааптара, «Ырыа АРГЫС» вокальнай ансаамбыл салайааччыта, СӨ култууратын туйгуна Николай Тырылгин «Күүтэбин» ырыатынан кытынна. Дьүүллүүр сүбэ кытаанах ирдэбилинэн биир дойдулаахпыт Николай Тырылгин III-с истиэпэннээх Лауреат буолары ситистэ. Санатан эттэххэ, «Күүтэбин» ырыа 2023 сыллаахха алтынньы 22 күнүгэр куорсун анньынан истээччи киэҥ араҥатыгар тахсыбыта. Ырыа долгутуулаах тыллара, киһи дууһатыгар дириҥник киирэр матыыба истээччи үрдүк хайҕабылын ылбыта. Бу куонкуруска Николай үгүс талааннаах ырыа айааччылары кытары күөн киирсэн, инники күөҥҥэ тахсыыта — мэлэдьиис быһыытынан маастарыстыбатын, айым-ньылаах үлэтин уонна үрдүк талаанын көрдөрдө.
«Иэйиим арылларын тухары саҥа ырыалары айа-тута туруом» диэн Николай баҕа санаатын кытары үллэһиннэ.
Ааптар Анастасия Бережнова