Чөл олоҕу, ыраастык туттан олорууну, физкультура уонна успуорт туһатын нэһилиэнньэҕэ бастакы тарҕатааччынан Александра Васильевна Серкина буолар.
Кини Петербург куораттан Саха сиригэр көскө кэлбит политссыылынай дьиэ кэргэнигэр 1918с. Витимҥэ төрөөбүтэ. 1934с. Дьокуускайга экономика техникумун бүтэрэн, идэтинэн үлэлээбитэ. 1936с. эрчимнээх, бары барыга көхтөөх эдэркээн кыыһы Орто Халымаҕа комсомол райкомун сэкирэтээринэн анаабыттара. Кэлээт, эдэркээн Шура Серкина ыччаты үөрэхтээһиҥҥэ, ыраастык туттан олорууга, физкультуранан дьарыктаныыга киэҥ үлэни ыыппыта. Кыһын бары хайыһардыыллара, нэһилиэктэргэ оччотооҕу ыччаттар хайыһарынан сылдьаллара.
Күһүн – сааһын күрэхтэһиилэр, субуотунньуктар, араас биэчэрдэр тиһигин быспакка ыытыллаллара. Ол сыл Халымаҕа «корь» диэн олус ыарахан ыарыы туран, эдэркээн сэкирэтээр маҥан халааты кэтэн, ыарыыны утары үлэни тэрийээччи, быһаччы кыттааччы буолбута. Эмчиттэргэ комсомолецтарынан көмө этэрээт тэриллэн, ыарыһахтары көрүү-харайыы ыар үлэтин сыраларын харыстаабакка толорбута. Ыарахан ыарыыны кыайыыга улахан оруолун учуоттаан, Саха сирин салалтата А.В.Серкинаны оччотооҕу кэм саамай үрдүкү наҕараадатынан «Саха АССР 15 сыла» диэн бэлиэнэн наҕараадалаабыта. Онтон ыла Александра Васильевна эмчит буолар санааны ылынан, 1940с. Иркутскай куорат мединститутун устудьуонунан буолбута. Сэрии кэмигэр госпиталларга санитаркалаабыта, сиэстэрэлээбитэ, дьулуурдаах үлэтин иһин «1941 – 1945сс. килбиэннээх үлэтин иһин» мэтээлинэн наҕараадаламмыта. Илин Сибиир чулуу кардиохирура, бэрэпиэссэр, медицинскэй наука дуоктара, институт кафедратын сэбиэдиссэйэ, Үлэ Кыһыл Знамята уордьаннаах Арассыыйа үтүөлээх бырааһа, Иркутскай куорат бочуоттаах олохтооҕо хас эмэ сүүһүнэн бырааһы иитэн таһаарбыта.
Кини икки кыыһа Елена уонна Надежда, сиэнэ Александра – быраастар. Александра Васильевна 1971с. биһиэхэ Халыма комсомолун 50 сыллаах үбүлүөйүгэр кэлэн кыттыбыта, эдэр сааһын доҕотторун кытта көрсүбүтэ, кэмпириэнсийэҕэ кыттыбыта, оскуола оҕолоругар кэс тылын эппитэ, эмчиттэргэ сүбэ-ама биэрбитэ. Халымаҕа олус ытыктанар, чаҕылхай киһибит, Илин Сибиир биир чулуу хирура Александра Васильевна Серкина 2007с. 89 сааһыгар олохтон барбыта. Кэнэҕэһин даҕаны ыччаттарбыт Халымаҕа араас сылларга кэлэн үтүө өйдөбүлү хаалларбыт чулуу дьоммутун умнубаттарыгар баҕарабын.
(Хаартыскаҕа: А.В.Серкина эдэр сааһын доҕотторун ортолоругар олорор).
Ааптар: Иннокентий Оконешников