Дурда-хахха буолар салалталаахпытынан киэн туттабын

Эйэлээх уу нуурал олохпутугар эмискэ этиҥ эппитинии, дойду үрдүнэн балаhыанньа тыҥаан, анал байыаннай эпэрээссийэ саҕаланан, хас биирдии киhини долгуппута. Ким билибтэ, сэрэйбитэ баарай, маннык кыhалҕа ааҥнаан кэлиэ диэн… Ол курдук байыаннай дьайыы уhук хоту улуустары да туора ааспата.

Биhиги биир дойдулаахтарбыт Сылгы Ыытартан төрүттээх оҕолорбут, уолаттарбыт эмиэ ким ыҥырыллан, ким баҕа өттүнэн дойдуларын көмүскүү сылдьаллар. Ол онтон ыла, биhиги чугас дьонноро, ийэлэрэ, аҕалара биир тэҥҥэ долгуйан, утуйар уубут уйгуурдаҕа. Хомойуох иhин, 8 уолтан биир уол суорума суолланна. Күннэтэ оҕолорбут этэҥҥэ эрэ буолалларын туhугар үрдүк айыылартан көрдөhөн-ааттаhан, саха сиэринэн сэмэйдик кэтэhэн олордохпут. Анал байыаннай эпэрээссийэҕэ барбыт уолаттарбытын уонна кинилэр дьиэ кэргэттэрин өйүүр сыаллаах, улууска сөптөөх үлэ былааннанан ыытылларын истэ-билэ олоробут. Онон, санньыар санаабыт арыый сайҕанан, эрэх-турах сананабыт. Ол курдук, улууспут Аҕа баhылыгар Иван Васильевич Лаптевка, Орто Халыма куорат Аҕа баhылыгар Николай Захарович Чукровка, Алаhыай нэhилиэгин Аҕа баhылыгар Алексей Николаевич Сивцевка, уолаттарбытын илэ баран көрсөн кэлбиккитигэр уонна социальнай өйөбүлгүт иhин ийэлии иhирэх махталбын тиэрдэбин. Маннык дурда-хахха буолар салайааччылардаахпытыттан киэн туттабын. Эhиэхэ күндү дьоммутугар үлэҕитигэр үрдүк ситиhиилэри, дьоһун дьоллоох олоҕу баҕарабын.

Ааптар: Анастасия Афанасьевна Бекренева, Сылгы Ыытар бөh.

Хаартыска: Баһылыктар Байыаннай дьайыы кыттыылаахтарын кытта көрсөллөр / Ааптар: Иван Лаптев

Читайте дальше