Муус устар 29 күнүттэн Орто Халыма куоратын «Южнай» киин хочуолунайын сүрүннүүр хочуола алдьанан, куорат олохтоохторугар кыһарҕан кэм үөскээн турар.
СӨ ОДьКХ Орто Халыматааҕы филиалын дириэктэрэ Александр Третьяков иһитиннэрэринэн, бу күн 3 кыра кыамталаах хочуол үлэлиир. Ыам ыйын 2 күнүттэн, температураны тутар сыалтан, түүҥҥү өттүгэр убаҕас уматык күүһүнэн 6-с нүөмэрдээх хочуолунай көмөҕө холбонуоҕа. Онон бу күннэргэ ОДьКХ тустаах үлэһиттэрин уонна исписэлиистэрин күүһүнэн, эргэрэн, туһаттан тахсан эрэр хочуоллар өрөмүөннэнэн, дьиэлэргэ итии киирэрин туһугар күүстээх үлэ ыытыллар. Болдьох быһыытынан, ситиминэн ититии бэс ыйын 3 күнүгэр диэри бэриллиэхтээх.