Бэтэринээрдэргэ аналлаах искибиэр

От ыйын 12 күнүгэр, Дьокуускай куоракка бэтэринээрийэ факультет территориятыгар Өрөспүүбүлүкэ   бэтэринээрдэригэр аналлаах саҥа искибиэр арылынна. 

Манна, Орто Халыма улууһуттан киэн туттар бэтэринээрдэрбит ааттара суруллубут өйдөбүнньүккэ биһиги ытыктыыр, бары билэр киһибит Егор Гаврильевич Винокуров аата баарыттан  олус долгуйдубут, үөрдүбүт.

Егор Гаврильевич туох баар олоҕун нэһилиэгин, сопхуоһун сылгыта- ынаҕа элбииригэр анаабыта. Бэтэринэриийэ саҥа ньымаларын үөрэтэн үлэтигэр туттара, кэнники сылларга элбэх ыстатыйалары суруйан «Знамя», «Халыма  долгуннара» хаһыакка бэчээттэппитэ.

Бу кини талан ылбыт идэтин ис сүрэҕиттэн таптыыра, онно бэриниилээҕин чаҕылхайдык туоһулуур.

Сүөһү иитиитин  курдук ыарахан үлэҕэ кини бэйэтин мындыр толкуйунан оҥорбут рационализаторскай оҥоһуктарын биир дойдулаахтара уһуннук туһанан махтаналлара. Егор Гаврильевич сылгы удьуордааһынын бэрээдэктээбитэ, элитнэй сылгыны таһаарбыта.Ол  сыспай сиэллээхтэрин билигин  атын улуустар былдьаһа атыылаһаллар. Баай уопуттаах бэтэринээр аҕаларын, эһэлэрин бэриниилээх үлэтин, олоҕун оҕолоро, сиэннэрэ сөҕө кэтииллэр.

Биһиги аймах ытыктыыр киһибит сырдык аата үйэтиллэн ыччаттарыгар хаалыаҕа.

Маны тэҥэ Өлөөкө Күөл отделениетын бастыҥ бэтэринээрдэрэ Анна Спиридоновна Явловская, Владимир Николаевич Винокуров, биир дойдулаахпыт Варвара Васильевна Созонова ааттарын көрөн киэн тутуннубут.

Ааптар: Анастасия Колесова

Читайте дальше