Бэлиэ кэм сонун тэрээһиннэрэ

Дойдуга Ийэ, Саха Өрөспүүбүлүкэтигэр Олоҥхо, Хомус күннэригэр аналлаах улуус муннугун аайы араас таһымнаах тэрээһиннэр ыытылыннылар. Уопсастыбаннай кэрэспэ- дьиэннэрбит көмөлөрүнэн эрэдээксийэ пуочтатыгар элбэх матырыйаал быыстала суох киирэр. Ыстатыйалар толору биэрсийэлэрэ, хаартыскалара, видеолара тутатына Телеграм ханаалбытыгар тахсаллар. Ааҕааччыларбытыгар тэрээһиннэр тустарынан сүүмэрдээн кылгатан таһаарабыт.

«Күн бытархайа-2024»

Хатыҥнаахха «Күн бытархайа-2024» куонкурус икки күн үрдүк таһымнаахтык ыытылынна. Бастакы күн, алын кылаас, иккис күн улахан кылаас оҕолорунан бэрт сэргэх кэнсиэр, уус-уран айымньы фольклора, хомоҕой хоһоон, ыллам ырыа, үҥкүү-битии куонкурустара буолан аастылар. Номинация аайы бириистээх миэстэлэр бэрилиннилэр, бииртэн биир талааннар, саҥа ааттар таҕыстылар. «Күн бытархайа» 25 үбүлүөйдээх сылын бэлиэтиир «ГРАН-ПРИ» хаһаайынынан уһуйаан сааһыттан хоһоон ааҕар, алтыс кылаас үөрэнээччитэ Дамир Кудрин ааттанна.

Сонун сүүрээн буолан ааста

Байды нэһилиэгэр Дойдуга Ийэ күнүн чэрчитинэн, дьахтар кэмитиэтин дэкээдэтэ буолан ааста. ЭКЦ «Айаан» киинигэр икки күнү быһа, эбэлэргэ, ийэлэргэ уонна кыргыттарга аналлаах, «Дэйбиир», «Дьиэ кэргэн харысхала» харысхаллары оҥорууга маастар-кылаастар буоллулар. Маны сэргэ ийэлэргэ волейбол күрэҕэ ыытылынна. Манна уопсайа 3 хамаанда кытынна. Сонун тэрээһининэн «Арт-Фуд маркет» буолла. Манна ийэлэр, эбэлэр, хос эбэлэр имигэс илиилэринэн оҥоһуллубут араас мал-сал быыстапкалара тэрилиннэ, итиэннэ эдэр «тортофея» ийэлэр араас минньигэс тортарын, пирожнайдарын, уо.д.а астарынан дьаарбаҥкалара, аукционнара буолла.

Үҥкүүһүт Дьиэ кэргэн

Иккис Хаҥалас нэһилиэгэр «Үҥкүүһүт Дьиэ кэргэн — Танцующая семья» күрэх ыытылынна.
Күрэх балаһыанньатынан, хас биирдии кылаастан, төрөппүт оҕотун кытта биир үҥкүүнү үҥкүүлээн көрдөрдүлэр. 1-7 кылаастарга муҥутуур кыайыылааҕынан 5-с кылаас үөрэнээччитэ Илона Колесова ийэтинээн «Нарисую тебе» диэн үҥкүүнэн таҕыстылар. Улахан кылаастарга «Где ты была» диэн үҥкүүнэн 9-с кылаас үөрэнээччитэ Ксюша Бережнова ийэтин кытта ыллылар. Кыттааччылар бары анал номинациянан наҕараадаланнылар.

Олоҥхо күнүн олоҥхолоро

Өлөөкө Күөлүгэр «Күөрэгэй» култуура киинигэр фольклор куруһуогун иитиллээччилэрэ олоҥхоттон быһа тардыыны аахтылар. Бэтэрээн эбэлэр оҥорбут куукулаларынан «Күн Күндүлү бухатыыр» олоҥхо туруорулунна. Көрө кэлбит уһуйаан иитиллээччилэрэ, оҕолор бэркэ диэн сэҥээрэн, иһийэн олорон көрдүлэр.
Маны сэргэ «Мас Батыйа бухатыыр» олохтоох олоҥхону күргүөмүнэн ааҕыы буолла. Манна араас тэрилтэлэртэн, бэтэрээннэртэн 11 киһи уочаратынан тахсан олоҥхону аахта. Саханы Аар-саарга ааттаппыт олоҥхобут дьоро киэһэтэ олус сонуннук тэриллэн ааста.

Бэй.инфо