Бу күннэргэ Орто Халымаҕа бэтэринээринэй сулууспа төрүттэммитэ 100 сыллаах үбүлүөйүн бэлиэтиибит.
Бэтэринээринэй сулууспа, элбэхтэ көстүбэт, үлэтэ иһиллибэт тэрилтэнэн билинэбит эрээри, улуус олоҕун, доруобуйатын, тыа хаһаайыстыбатын сайдыытын тутан олорор, аһыыр аспыт иҥэмтиэлээх, ыраас хаачыстыбалаах буоларын туһугар үлэлиир, ииттэр сүөһүбүт, дьиэбит кыыла-көтөрө доруобай буоларын туһугар туруулаһар, кэскиллээх олоҕу, сайдыыны саҕар биир тутаах тэрилтэнэн буолар. Онон бэтэринээринэй сулууспа кэлэктиибин, үлэ бэтэрээннэрин, туйгуннарын, улуус бары олохтоохторун өрөгөйдөөх үбүлүөйбүтүнэн итиитик-истиҥник эҕэрдэлиибит!
Муус устар 4 күнүгэр, үбүлүөйдээх тэрээһин чэрчитинэн, улууска бастакытын «Бастыҥ бэтэринээринэй быраас-2024» куонкурус ыытылынна.
Дьүүллүүр сүбэ хамыыһыйатыгар улуустааҕы тыа хаһаайыстыбатын начаалынньыгын солбуйааччы Мария Александровна Шарина, улуустааҕы бэтэринээринэй сулууспа салайааччыта Николай Николаевич Новосельцев, бэтэринээринэй сулууспа сэбиэдиссэйэ, үлэ туйгуна Тамара Петровна Третьякова үлэлээтилэр.
Куонкуруска анал идэлээх бэтэринээр быраастар, учаастак сэбиэдиссэйдэрэ, Иккис Мээтис нэһилиэгиттэн Диана Дмитриевна Оконешникова, Сиэн Күөлүттэн Максим Петрович Винокуров, Валерий Иванович Тарасов, Иккис Хаҥаластан Евдокия Ивановна Слепцова, Байды нэһилиэгиттэн Максим Николаевич Меняков кытыннылар.
Бастакы түһүмэххэ кыттааччылар үгэс курдук бэйэлэрин, дьиэ кэргэттэрин, дьарыктарын, үлэлэрин туһунан билиһиннэрдилэр.
Иккис түһүмэххэ, үлэлэрин хайысхатынан 5-тии боппуруоска эппиэттээн билиилэрин тургуттулар.
Үһүс түһүмэххэ дьон-сэргэ иннигэр талааннарын көрдөрдүлэр. Манна Диана Оконешникова кэргэнин Рустам Оконешниковы кытта үҥкүүлээн дьон биһирэбилин ыллылар. Максим Винокуров, Халыма сценатыгар өтөрүнэн көстүбэтэх сонун нүөмэринэн — породиянан көрөөччү сэҥээриитин ылла. Валерий Иванович дьоро киэһэлэри ыытар, дьону-сэргэни аралдьытар сатабылларынан толордо, 3700солк. диэри аукционунан морожканы оонньотон баран, түмүгэр буор босхо бэлэх уунна. Үгүс киһи ымсыыран эрэ хааллыбыт. Евдокия Ивановна минньигэс туортары, кэрэ симэхтэри, киэргэллэри оҥорорун билиһиннэрдэ, төрөөбүт түөлбэтигэр төрөппүттэригэр анаан олоххо киллэрбит ретро-мусуойун көрдөрдө. Максим Николаевич ыт доҕорун Йокону кытта ураты нүөмэри көрдөрөн көрөөччүнү олус үөртүлэр, сэргэхситтилэр.
Бүтэһик түһүмэххэ, бэтэринээрдэр үлэлэрин көстүүмүн кэтэн, сөбүлүүр харамайдарын тутан тахсыбыттара олус сэргэх көстүү буолла. Бу курдук улууска биир бастакытын, олус сонун, сэргэх тэрээһин ыытылынна.
Куонкурус 4 түһүмэҕин түмүгүнэн кыттааччылар:
- «Билиилээх быраас-Врач интеллектуал» —Д.Д.Оконешникова (Сыбаатай);
- «Талааннаах бэтэринээр-Талантливый врач» — Е.И.Слепцова (Эбээх бөһ.);
- «Бастыҥ аҕа сүбэһит-Лучший наставник» – В.И.Тарасов (Ойуһардаах);
- «Идэтигэр бэриниитин иһин- За верность в профессии» — М.Н.Меняков,
- «Бэтэринэриийэ кэскилэ-Надежда ветеринарии» – эдэр исписэлиис М.П.Винокуров (Ойуһардаах) анал ааттарынан наҕараадаланнылар.
- Куонкурус муҥутуур кыайыылааҕынан, бэтэринээрдэр настаабынньыктара, үлэ туйгуна, 33 үлэ ыстаастаах Валерий Иванович Тарасов таҕыста.
Кэрэ-бэлиэ тэрээһин дьоро киэһэтигэр Бочуоттаах ыалдьыт СӨ тыатын хаһаайыстыбатын министиэристибэтин агропромышленнай хааччыйыы өрөсүүрсэлэрин киинин дириэктэрин солбуйааччы Дмитрий Анатольевич Филиппов идэлээх бэтэринээрдэри, үлэ бэтэрээннэрин эҕэрдэлээтэ, тыа хаһаайыстыбатын сайдыыта СӨ Ил Дарханын сүрүн болҕомтотугар, өйөбүлүгэр тутар диэн бэлиэтээтэ, 2030 сылга диэри тыа хаһаайыстыбатын оҥорон таһаарар бородууксуйата 30% улаатыахтаах диэн стратегическэй укааһа тахсыбытын туһунан иһитиннэрдэ, улуустааҕы бэтэринээринэй сулууспа салайааччытыгар СӨ министиэристибэтин аатыттан Махтал сурук туттарда.
Маны сэргэ үлэ туйгуннара, бэтэрээннэрэ, уһун сылларга үтүө суобастаахтык үлэлээбит бэтэринээрдэр, Орто Халыма улууһун баһылыгын, куорат дьаһалтатын, улуустааҕы тыа хаһаайыстыбатын управлениетын, бэтэринээринэй сулууспа салалтатын аатыттан Бочуотунай кырааматанан, Махтал суругунан, үлэ бэтэрээннэрэ, туйгуттара «Бэтэринээринэй сулууспа» бэлиэнэн наҕараадаланнылар. Эҕэрдэлэргэ, улууска саамай элбэх төбө сүөһүнү тутан олорор нэһилиэк Бастакы Хаҥалас баһылыга А.А.Томскай кыттыста.
Үбүлүөй чэрчитинэн нэһилиэнньэҕэ ыытыллыбыт хаартысканан түһэрии уонна уруһуй «Мой мохнатый друг», «Мой любимый питомец и я» «Лучший якутский наряд лошади», «Стоп-кадр», «Я стильный как и вы» куонкурустар кыайыылаахтара анал сэртипикээтинэн, кырааматанан наҕараадаланнылар.
Бэтэринээринэй сулууспа кэлэктиибин, үлэ туйгуннарын, бэтэрээннэрин өссө төгүл үбүлүөйдээх кэрэ-бэлиэ бырааһынньыккытынан итиитик-истиҥник эҕэрдэлиибит!
Дириҥ суолталаах, эппиэтинэстээх үлэҕитигэр үрдүк ситиһиилэри, тус олоххутугар дьолу-соргуну баҕарабыт.
Ааптар: Саргылана Кокорина
Хаартыска ааптара: Саргылана Кокорина
