Ыйытыылар, этиниилэр
Үлэ бэтэрээннэригэр уонна доруобуйатын көрдөрүнэр дьон кэлэр-барар ороскуотугар, эмп-томп өттүгэр уо.д.а. көрүллэр чэпчэтиилэр; тыа хаһаайыстыбатын үлэһитэ доруобуйаны чэбдигирдэр кииҥҥэ көрдөрүнэригэр, эмтэнэ сынньана барарыгар көмө өйөбүллэр; сөмөлүөтүнэн кэлии-барыы бырайыаһа; өртөөһүн; биэ төбөтүгэр көрүллэр 5000 солк. ханнык статустаах хаһаайыстыбаҕа бэриллэрэ; собону үөскэтии, сылгыга ыарахан дьыл буолбутунан эбии аһылык көрүллүүтэ; убаҕас уматыгы кэмигэр тиэйии; тарированнай уматык кээмэйэ нуорматыгар эппиэттээбэтэ; улуус балыыһатыгар миэстэтигэр нарколог, психолог быраас суоҕа; бөһүөлэккэ икки дьиэ киин ититиигэ холбоно илигэ; «Сахаспецтранс» тэрилтэ нэһилиэнньэни иһэр уунан хааччыйыыта; олохтоох балыыһа өрөбүл күннэргэ үлэлээбэтэ этилиннэ; улуус киинигэр тыаттан киирэр тиэхиньикэ тохтууругар гараас сүрүн кыһалҕа буолара ыйылынна. Маны сэргэ «Туллукчаана» оҕо уһуйааныгар өрөмүөн ирдэнэрин туһунан төрөппүт кэмитиэтэ туруоруста.
Ыйытыктарга хоруй
Баһылык Иван Васильевич тарированнай уматыгы хонтуруолга тутуоҕун, нэһилиэнньэни уунан хааччыйыы олохтоох ОДЬКХ көмөтүнэн оҥоһуллуон, собону үөскэтиини Хатыҥнааҕы кытта кэпсэтии ыытыллыан сөптөөҕүн, тыаттан киирбит тырааныспар, миэстэ баар буоллаҕына, улуус дьаһалтатын гарааһыгар быстах кэмҥэ киириэн сөп диэн хоруйдаата. Уһуйаан өрөмүөнүгэр анал хамыыһыйа оҥорбут сайаапката тустаах салалтаҕа бэриллибитин, улуустааҕы үөрэх управлениетын начаалынньыгын А.П.Петрованы кытта эбийиэк туругун көрүөхпүт диэн эрэннэрдэ. Тыа хаһаайыстыбатын управлениетын салайааччыта Дмитрий Николаевич күһүҥҥү өртөөһүн балаҕан ыйын 15 күнүттэн ыытыллыан сөбүн, собону үөскэтиигэ үлэ барарын, ол эрэн, бастакы холонуулар табыллыбатахтарын, маны сэргэ балыгы үөскэтиигэ эмиэ үлэ ыытыллыан наадатын бэлиэтээтэ. Тыа хаһаайыстыбатын үлэһиттэрин доруобуйаларын чэбдигирдиигэ болҕомто ууруллуоҕа, өйөбүл баар буолуо диэн эрэннэрдэ. Итиэннэ бөрөнү бултааһыҥҥа туох төлөбүрдэр баалларын сырдатта. Социальнай салаа бырагыраамаларыгар тирэҕирэн козаны, кууруссаны, сибиинньэни иитэргэ ыҥырда.
Үлэ сылын түмүгүнэн баһылык Иван Лаптев, улуус дьаһалтатын аатыттан бэтэринээринэй учаастак үлэһитигэр Анна Спиридоновна Явловскаяҕа уонна сылгы Собуотун дириэктэрин солбуйааччытыгар Иван Иванович Винокуровка Бочуоттаах кырааматаны туттарда.
Түмүккэ олохтоох дьаһалта баһылыга Афанасий Афанасьевич Томскай, мунньах хамыыһыйатыгар, бөһүөлэккэ успуорт саала тутуллуутун уонна оҕо уһуйааныгар өрөмүөн ыытыллыытын булгуччу боротокуолга киллэрэллэригэр туһаайда уонна ОДЬКХ дьаһалтата «Сахаспецтранс» тэрилтэ үлэтин хонтуруолга ыларыгар этии киллэрдэ, кэлбит салайааччыларга махталын биллэрдэ. Нэһилиэк олохтоохторо дьаһалта мунньаҕын таһаарыылаахтык ыытыллыбытынан бэлиэтээтилэр.
Ааптар: Изабелла Ноговицына