Олунньу 10 күнүгэр ыаллыы сытар Сыбаатай бөһүөлэгэр, аҕам саастаахтар ыҥырыыларын ылынан, успуорт күрэҕэр, табаарыстыы көрсүһүүгэ уонна кэнсиэр көрдөрө Эбээхтэн 50-тан үрдүк саастаахтар бара сырыттыбыт.
Ол курдук Волейболга, «Веселые старты» уонна оҕунан ытыыга күрэхтэһэн, кыайан-хотон кубок ылар чиэскэ тигистибит.
Кэнсиэркэ «Далбардар» ырыа-үҥкүү, «Ньургуһун» үҥкүү уонна көрдөөх сценкалары көрдөрөн, көрөөччүлэр ытыстарын тыаһыгар толордубут.
Инникитигэр маннык күрэхтэри ыыта турарга, төһө кыалларынан Алаһыай нэһилиэктэрин кытта холбоон оҥорорго диэн этии киллэрдибит.
Бу сырыыбытыгар, этиибитин ылынан, уматыгынан хааччыйбыт нэһилиэкпии баһылыгар Юрий Алексеевич Гуляевка, суоппар уолаттарга, кулууп үлэһиттэригэр Ульяна Александровнаҕа, Мария Шадринаҕа сүҥкэн махталбытын тиэрдэбит!
Ааптар: Людмила Никитина, Эбях бөһ.