Е.М.Слепцов аатынан «Родина» успуорт уораҕайын бүгүҥҥү күнэ, суолу оҥорор тэрилтэ үлэһиттэригэр ананна. Сайдыы суолун бастакынан саҕар, Орто Халыматааҕы «Аартыка суоллара» филиал үлэһиттэрэ үгэс курдук бу да сырыыга бэлиэ күннэрин успуорду, чөл олоҕу кытта доҕордоһон көрүстүлэр.
Ол курдук биирдиилээн кыайыы иһин оҕунан уонна буулдьалаах саанан ыттылар, дартс бырахтылар. Маны сэргэ үс хамаандаҕа арахсан «Перестрелка» мээчигинэн тамнастылар, 6 түһүмэхтээх көрдөөх стартка кытыннылар. Күрэхтэри тэрилтэ салайааччыта Илья Моттуев, «Родина» инструктора Галина Винокурова уонна үлэһитэ Николай Слепцов салайан ыыттылар.
«Бырааһынньыктаах күммүтүн, бэһис сылбытын успуорт көрүҥнэринэн күрэхтэһэн көрүстүбүт. Маннык үгэһи, 2019 сылтан, оччолорго салайааччыбыт Егор Николаевич Константинов төрүттээбитэ. Бүгүн, успуорду, чөл олоҕу, көхтөөх олоҕу өрө тутар 22 үлэһит кытынна. Традиционнай туорпутун, сокпутун, мэтээллэрбитин, кырааматаларбытын уо.д.а. Профсойууспут өйүүр. Маны сэргэ сылын аайы, профсойууспут үбүлээһининэн, 2022 сыллаахтан байыаннай хомуурга түбэһэн, Анал байыаннай дьайыыга кытта сылдьар «Север» позывнойдаах буойуммут дьиэ кэргэнигэр бэлэх оҥоробут уонна ийэтигэр «Халыма долгуннара» хаһыакка сыл аҥарыгар сурутабыт. Уолаттарым бары 100% профсойуус чилиэнинэн буолаллар. Ол иһин тэрилтэбит сомоҕолоох, барытыгар көхтөөх»,- диэн тэрилтэ тутаах үлэһитэ, соҕотох кэрэ аҥар, профсойуус бэрэстэбиитэлэ Светлана Пантелеймоновна бүгүҥҥү тэрээһин туһунан кэпсээтэ.
Бу курдук уолаттар илин-кэлин түсүһэн, тиритэн- хорутан быйылгы сыллаах бастыҥнарын быһаардылар.
Саамай аҕа саастаах Сергей Алексеевич Тайшин мэтээл бөҕө кэтэн эдэр дьоҥҥо холобур буолла.
Тэрээһин түмүгүнэн, оҕунан ытыыга III м. — Лаптев Евгений, II м. — Тайшин Максим, I м. — Бубякин Евгений үллэһиннилэр. Буулдьа саанан ытыыны III м. — Валерий Лаптев, II м. — Бандеров Иван, I м. — Лаптев Евгений ыллылар, оттон Дарска быраҕыы бастыҥынан Юрий Кошелев буолла, Сергей Тайшин — II м., III м. — Евгений Бубякин ыллылар. Хамаанданан күрэхтэргэ, Перестрелкаҕа — I м. «Стрелок» (хап.Иван Кокорин), II м. — «Карданный вал» (Иван Бандеров) III м. — «Кувалда» (Сергей Тайшин). Көрдөөх күрэххэ: I м. — «Кувалда» II м. — «Карданный вал» III м. — «Стрелок».
Сотору кэминэн сир тоҥуо, муус туруо, ону кытта кыһыҥҥы суолу оҥорооччулар үлэлэрэ күөстүү оргуйуо, чысхааннаах тымныылары аахсыбат уһун синньигэс айаннара саҕаланыа…
Аны аҕыйах хонугунан кинилэр үлэлэрин кэтиэхпит, суол оҥорооччулар сырыыларын маныахпыт.
Уолаттарга көнө суоллары, ситиһиилээх сырыылары, үлэлэрин былааннара кэмигэр туолан, толоруллан иһэллэригэр баҕарабыт.
Ааптар: Саргылана Кокорина