Бэс ыйын 25 күнүгэр, Алаһыай нэһилиэгэр олохтоохторо, күндү төрөппүттэрбит, күн күбэй ийэбит Варвара Афанасьевна Созонова (Кудрина), амарах аҕабыт Гаврил Алексеевич Созонов ыал буолан бииргэ олорбуттара 50 сылын бэлиэтээтилэр. Күндү дьоммут кыһыл көмүс сыбаайбаларын 5 оҕонон дьоллонон, күн бүгүн 7 сиэннэнэн, хос сиэн минньигэс сытын ылан көрүстүлэр.
Биһиги ийэбит Варвара Афанасьевна Созонова (Кудрина), 1949с.атырдьах ыйын 26 күнүгэр Хатыҥнаах нэһилиэгэр Мария Афанасьевна Кудрина дьиэ кэргэнигэр иккис оҕонон күн сирин көрбүтэ. Константин диэн убайдааҕа. Орто оскуоланы Орто Халыма куоратыгар бүтэрэн, Улуу Бүлүү өрүс эҥсиэли хочотугар алын кылаас учууталын идэтин орто анал үөрэҕи баһылаабыта. Маҥнай Арҕахтаах нэһилиэгэр интэринээккэ иитээччинэн, онтон Алаһыай орто осуолатыгар алын кылаас, төрүт култуура, муусука учууталынан ситиһиилээхтик үлэлээн, Педагогическэй үлэ бэтэрээнэ, Саха Сирин үөрэҕириитин туйгуна, «Үөрэнээччилэр билиниилэрэ» бэлиэ хаһаайката буолан, билигин бочуоттаах сынньалаҥҥа олорор. «Дьүөгэлиилэр» түмсүү чилиэнэ буолан, нэһилиэк, улуус уопсастыбаннай олоҕун көхтөөх кыттааччыта. Айылҕаттан бэриллибит дьоҕурунан, ырыаҕа, хомуска, саха фольлоругар, култууратыгар элбэх оҕону үөрэппитэ-такайбыта.
Тапталлаах аҕабыт Гаврил Алексеевич Созонов, 1949с. балаҕан ыйын 3 күнүгэр Алаһыай нэһилиэгэр, элбэх оҕолоох Созоновтар дьиэ кэргэттэригэр 4-с оҕонон төрөөбүтэ. Орто оскуоланы Орто Халыма куоратыгар бүтэрбитэ. Сэбиэскэй Аармыйа кэккэтигэр ситиһиилээхтик сулууспалаан кэлбитэ. Маҥнай Алаһыай сопхуоска үлэлээбитэ, онтон нэһилиэк уонна оскуола хочуолунайдарыгар үлэлээн биэнсийэҕэ тахсыбыта. Үлэтигэр эппиэтинэһин иһин араас таһымнаах кырааматанан, Махтал суругунан наҕараадаламмыта.
Ийэлээх, аҕабыт 1975 сыллаахтан олох биир суолунан эйэ-дэмнээхтик иллээхтик олорон, барыбытыгар холобур буолар олоҕу олороллор. Ынах, сылгы ииттэн, бэһиэммитин атахпытыгар туруоран, барыбытын үөрэхтээх дьон оҥорон, билигин бука бары быр-бааччы дьиэ-уот тэринэн, оҕо төрөтөн, үлэлээн-хамсаан олоробут. Кинилэр сиэннэрин: Виталийы, Снежананы, Раисаны, Максимы, Гаврилы, Ксенияны, Аленаны тэҥҥэ бүөбэйдэһэн, көмөлөһөн, үөрэтэн-такайан атахтарыгар туруорустулар. Бастакы хос сиэннэрин Ярославы көрөн үөрүүлэрэ үрдээн, дьоллоро элбээн олороллор.
Төрөппүттэрбит айылҕаҕа бииргэ сылдьалларын олус сөбүлүүллэр. Кыра эрдэхпититтэн отоҥҥо, тэллэйгэ бииргэ сылдьан улааттыбыт. Саха ыалын сиэринэн билигин да сылгы туталлар. Кинилэр биһиэхэ бэйэлэринэн холобур буолан, батыһыннара сылдьан олоххо сүбэлээн-амалаан киһи оҥорбуттарыгар махталбыт муҥура суох. Кинилэр мындыр өйдөрүнэн ииппит-үөрэппит үтүөлэринэн биһиги үлэҕэ-үөрэххэ ситиһиилээх, дьон сиэринэн бары олохпутун оҥостон олоробут. Кыргыттара: Екатерина – В.А.Местников аатынан Алаһыай орто оскуолатыгар, алын кылаас учууталынан үлэлии-хамсыы сылдьар. СӨ үөрэҕириитин туйгуна. Мария – Н.И.Шарин аатынан Орто Халыматааҕы орто оскуола каадыр отделын иниспиэктэрэ, Олимпиада – 2-с нүөмэрдээх Өрөспүүбүлүкэтээҕи балыыһа УЗИ отделениятын сэбиэдиссэйэ, СӨ Доруобуйа харыстабылын туйгуна. Уолаттара: Игнат 2-с нүөмэрдээх Өрөспүүбүлүкэтээҕи балыыһаҕа электригынан үлэлиир. Владимир – Дьокуускай куоракка Саха Сирин сүрүн үөрэхтээһин управлениетыгар системнай администраторынан ситиһиилээхтик үлэлии-хамсыы сылдьар. Биһиги ийэлээх аҕабытын 50 сыл сүүс сүүстэриттэн өйөһөн-өйдөһөн, ийэ-аҕа, эбээ-эһээ, хос эбээ-хос эһээ үрдүк аатын сүгэн олороллоруттан, уруйдаан-айхаллаан туран, ис сүрэхпититтэн эҕэрдэлиибит, бииргэ үөрэбит, дьоллонобут! Күндү төрөппүттэрбитигэр өссө да өр сылларга биһигиниин бииргэ буолан, араҥаччылыы, арчылыы, ыарыыга ылларбакка, чэгиэнник-чэбдиктик сылдьаргытыгар, биһиги тапталбытыгар куустаран уһун үйэлээх олоҕу олороргутугар баҕарабыт!
Оҕолоро, сиэннэрэ, хос сиэннэрэ