Орто Халыматааҕы бэтэринээринэй сулууспа иһитиннэрэринэн, бу күннэргэ дьиэ сүөһүтүгэр сааскы быһыы тэрээһиннэрэ ыытыллаллар.
Бу күн туругунан улуус үрдүнэн 303 ыкка, 67 куоскаҕа ииримтийииттэн утары быһыы туруорулунна. Маны сэргэ ынах, сылгы сүөһүгэ уонна табаҕа профилактическэй үлэлэр, ол эбэтэр быһыы туруоруу, үөнү түһэрии оҥоһуллар.
Бу дьыл кулун тутар 20 күнүттэн Орто Халыма улууһун территориятыгар ииримтийииттэн сэрэхтээх буолуу эрэсиимэ биллэһиллэн турар. Санатан эттэххэ, Сылгы Ыытар территориятыгар саһыл, Ойуһардаахха кырса, Орто Халыма куоратыгар ыт ииримтийии ыарыынан ыалдьыбыттара бигэргэммитэ.
Улуустааҕы бэтэринээринэй сулууспа салайааччыта Николай Новосельцев этэринэн, биһиги улууспутугар маннык ыарыы, 2017 сыллаахха, эмиэ саһылтан булуллубут.
Ааптар: Саргылана Кокорина