Быйыл, 2024 сыллаахха, Хатыҥнаахха эмэн саас- таахтар спартакиадаларыгар 200 ыалдьыт Эдуард диэн ааты бэркэ билэн барбыт буолуохтаахтар.
Кини успуорт ханнык да көрүҥэр киирсэн иһэр киһи. Олорбута 60 сылын туолуутугар ааҕан сиппэт наҕараадалаах. Ол хобби кэриэтэ. Дьиҥнээх төрөөбүт хааныгар Алаһыайын уута уста сылдьар буолан, бэл Хатыҥнаах Сайбалааҕын курдук бытархай балыктаах күөлүттэн нэһилиэк олохтоохторун, кэлэр-барар хоноһолорун күндүлээн үөрдэр. Эдуард Васильевич балыксыт мындыр идэтигэр, көмүс хатырыктааҕы хото хостуурга элбэх ыччаты, оскуола оҕолорун, бэйэтин кытта илдьэ сылдьан көҕүппүт, үөрэппит үтүөлээх.
Быыс кэмигэр уус-уран көрүү араас көрүҥэр көхтөөхтүк кыттан, көрөөччүлэри олус сэргэхситэр идэлээх. Онуоха эбии кэрэ оҥоһуктары айарга кимтэн да хаалсыбат. Биһиги Эдуарбыт саамай махталлаах хаачыстыбатынан, дьоҥҥо көмөлөһөргө ким хайа иннинэ баар буолааччы, ол иһин улахан ытыктабылга сылдьар.
Э.В.Берёзкиннар дьиэ-кэргэттэрэ кыаммат киһини бэйэлэригэр көрүүгэ-харайыыга ылан олус абыраатылар. Бэйэлэрэ түөрт оҕолорун үлэһит оҥортоон, элбэх сиэннэнэн, көмө-имэ буолан, баай ис хоһоонноох олохтоохтор. Ийэлэрэ Варвара Михайловна илиититтэн араарбат оһуордьут-иисчит. Дьиэнэн бары кэрэни кэрэхсиир аймахтар. Кыыстара Варвара Красильникова «Саха» национальнай көрдөрөр-иһитиннэрэр хампаанньа «Өркөн өй» биэриигэ ситиһиилээхтик кыттан, ону тэҥэ «Сулустардыын бииргэ» куонкуруска биллэр ырыаһыт Ирена Файрушинаны кытта дуэттаан Сахабыт Сиригэр билиннэ, көһүннэ. Кини ситиһиитинэн төрөппүттэрэ уонна нэһилиэк олохтоохторо астынабыт, киэн туттабыт..
Үйэ аҥара анараа өттүгэр үөрэх эйгэтигэр үөрэппит оҕом Эдик, оччоттон-баччаҕа диэри «учууталым» диэн олус истиҥник, ытыктабыллаахтык ааттаан, тус аймаҕым да буолбатар, иитэн-харайан сылдьарыттан муҥура суох махтанабын, оҕоломмут тэҥэ сананабын. Күндү дьоммор дьоллоох олоҕу, сирдээҕи анаммыт олохпут бары үтүөтүн ис сүрэхпиттэн баҕарабын. Дьоллоох, доруобай буолуҥ!
Мария Кудрина-Сылык, Хатыҥнаах бөһ.