Орто Халыма улууһугар «Үтүө дьыала харыйата» аахсыйа улуус салалтатын көҕүлээһининэн ахсынньы 11 күнүттэн саҕаланна. Онон бу күннэргэ улуус нэһилиэктэригэр, олохтоох дьаһалталар көҕүлээһиннэринэн, үлэ тэрилтэлэрин көмөлөрүнэн үтүө дьыала аахсыйата ыытыллар.
Анал аахсыйа ыарахан усулуобуйалаах уонна анал байыаннай дьайыыга кытта сылдьар буойуттар дьиэ кэргэттэрин оҕолоругар ананан тэриллэр. Орто Халыма куоратыгар аахсыйаҕа 35 оҕо хабылынна. Аахсыйаҕа кыттыан баҕалаах дьон улуус дьаһалтатын дьиэтигэр, 305 кэбиниэккэ, улуус баһылыгын социальнай бэлиитикэҕэ солбуйааччытыгар Александра Петровна Явловскаяҕа билсиэхтэрин сөп.
Маны сэргэ үгэс быһыытынан, сылын аайы ыытыллар «Оҕолорго аптаах саҥа дьылы бэлэхтээ!» аахсыйаны Орто Халыматааҕы үлэ уонна нэһилиэнньэ социальнай көмүскэлин, дьиэ кэргэн уонна оҕо көмүскэлин отделениета саҕалаата.
Аахсыйа ахсынньы 28 күнүгэр диэри ыытыллыаҕа.
Үтүө хамсааһыҥҥа кыттыан баҕалаах дьону 8 41156 41 327, 8 41156 41-530 нүөмэрдэргэ билсэргитигэр ыҥыраллар.
Ааптар: Саргылана Кокорина