«Илии сылааһа» дьахталлар хамсааһыннарын чэрчитинэн төрүттэммит өрөспүүбүлүкэтээҕи иистэнэр сыахха биһиги улууспут 5 кэмпилиэги тигэн ыыппыта. Үтүө дьыалаҕа Сыбаатайтан, Сылгы Ыытартан, Налимскайтан, Өлөөкө Күөлүттэн, Хатыҥнаахтан, Арҕахтаахтан, Ойуһардаахтан, Орто Халыма куоратыттан кыттыбыттара.
Санатан эттэххэ, анал хамсааһын биһиги улууспутугар, кулун тутар 6 күнүттэн, «Сымнаҕас күүс» дьахталлар улуустааҕы пуорумнарын чэрчитинэн тэриллибитэ.
Өрөспүүбүлүкэтээҕи сыахха биһиги улууспутуттан Варвара Филипповна Третьякова кыттар. Кини үтүө хамсааһын туһунан бу курдук сэһэргиир:
«Биһиги иистэнньэҥнэрбит тикпит таҥастарын, сыах маастардара олус биһирээтилэр, кылгас бириэмэ иһигэр кичэллик, үчүгэйдик тигиллибиттэр диэн бэлиэтээтилэр.
Дьокуускай куоракка сыахпыт 100% успуонсардар өйөбүллэригэр тирэҕирэн, сарсыарда 08ч00м киэһэ 20ч.00м диэри тохтоло суох үлэлиир. Сорох дьон хойукка диэри иистэнэ хаалар.
Тигиллибит кэмпилиэктэри «вещмешок-Эр хоһуун» диэн анал мөһөөччүктэргэ угабыт. Бу мөһөөччүктэри эмиэ манна тигэбит. Матырыйаалбыт Москваттан кэлэр. Маллары байыаннай чаастарга тиэрдэр доброволец, баҕа күүһүнэн тиэйэр эр дьон тиэрдэллэр. Ааммыт куруук аһаҕас, кэнники уолаттарбыт хантыраак баттаан бараллар буоллулар. Быстах хомуурга хапсан барбыт уолаттар, уоппускаттан төннөллөрүн саҕана биһигиттэн таҥнан бараллар.
Бу күннэргэ, анал байыаннай дьайыыттан уоппускаларыгар кэлэ сылдьар биир дойдулаахтарбыт (Сыбаатайтан, Өлөөкө Күөлүттэн, Ойуһардаахтан төрүттээх) биирдии кэмпилиэги ылан, астынан, үөрэн, долгуйан, махтанан аҕай бардылар. Онон аһыныгас сүрэхтээх, үтүө майгылаах дьон күүһүнэн, сыахпыт быыстала суох үлэлиир. Элбэх киһи өйөбүлүн-санаатын биллэрэр, көмөлөһөр. Биир көмө киһибитинэн, Бастакы Хаҥалас нэһилиэгиттэн төрүттээх Максим Винокуров буолар. Кини туохха наадыйарбытынан тутатына көмөлөһөр, массыынатынан тиэйэр-таһар, булар-талар, аҕалар.
Хаһыат эрэдээксийэтин нөҥүө, үтүө хамсааһыҥҥа кыттыбыт, кыттар дьоммутугар истиҥ махталбытын биллэрэбит».
Ааптар: Саргылана Кокорина
