Ыһыахха үлэ тэрилтэлэринэн, уопсастыбаннай хамсааһыннар түмсүүлэринэн баай-талым сандалылаах, алгыстаах-арчылаах түһүлгэлэр тэрилиннилэр.
Орто Халыма куорат дьаһалтатын көҕүлээһининэн үлэ тэрилтэлэрин холбоһук түмсүүлэрин иһинэн араас таһымнаах, «Бастыҥ түһүлгэ», «Саха талба таҥаһа», «Өбүгэ быстыбат ситимэ» «Иэйиилээх эҕэрдэ», ох саанан ытыы, сүүрүүлээх- көтүүлээх «Халыма ыччата» күрэхтэр, куонкурустар ыытылыннылар.
Сайаапка быһыытынан Орто Халыма улууһун дьаһалтата, СӨ ОДьКХ Орто Халыматааҕы филиала, Үөрэхтээһин тэрилтэлэрэ, Оройуоннааҕы дизэльнэй электростанция, Орто Халыматааҕы кииннэммит балыыһа, Үлэ уонна социальнай харысхал киинин холбоһук тэрилтэлэрэ кыттан бырааһынньыгы үрдүк таһымҥа көҕүлээтилэр.
«Саха талба таҥаһа» куонкурус Дойдуга Дьиэ кэргэн, СӨ Оҕо саас сылыгар ананна. Сцена бастыҥнарынан, элбэх оҕолоох Орто Халыма куоратын олохтоохторо Александр, Анастасия Третьяковтар буоллулар.
Уопсай сочуотунан, «Ыһыах 2024» Бастыҥ тэрилтэтинэн СӨ ОДЬКХ Орто Халыматааҕы филиала ааттанна, II-с миэстэҕэ Улуус дьаһалтата ааттанна, III-с Бочуоттаах миэстэни Орто Халыма кииннэммит балыыһата ылан кырааматанан уонна Орто Халыма куоратын дьаһалтатын аатыттан харчынан бириэмийэ туттарылынна. Маны сэргэ улуус уонна куорат дьаһалталарын ааттарыттан биирдиилээн куонкурустарга бириистээх миэстэлэр олохтоннулар. Эр дьоҥҥо ыйааһыннарынан мас тардыһыыта, хапсаҕай ыытылынна.
Ааптар: Саргылана Кокорина