От ыйын 26 күнүн туругунан, улуус үрдүнэн 1123 от оттонон, былаан 20,6% тэҥнэстэ.
Ол курдук Сыбаатайдар 230 туонна (59%) оту оттоон, бастыҥ көрдөрүүлээх иһэллэр. Өлөөкө Күөлэ — 342т (28%), Арҕахтаах — 101т (25,3%), Хатыҥнаах — 51т (21%), Ойуһардаах — 228(18%), Сылгы Ыытар — 70т (18%), Налимскай — 31т(6,2%), Эбээх 70 (7%) туонна ылбыттар.
От ыйын 28 күнүгэр, Бастакы Хаҥалас нэһилиэгэр өбүгэ саҕаттан үгэс буолан кэлбит «Күүлэй-2024» буолан ааста.
Быйылгы ходуһа бырааһынньыга, дьахтар күүһүнэн тэрилиннэ. Ол курдук 8 кэрэ аҥар илиинэн харбаан, куопуналаан илин-кэлин түһүстүлэр.
Күргүөмнээх үлэ түмүгүнэн, Г.Г.Софронов аатынан агрохайысхалаах орто оскуола кэлэктиибин эр дьонун күүһүнэн икки от кэбиһилиннэ.
«Күүлэй-2024» бастыҥнарынан буоллулар:
I м. Анна Ивановна Винокурова,
II м. Евдокия Гавриловна Лаптева,
III м. Мария Ивановна Винокурова.
Бастыҥ харбааччылар уонна «Аҕам саастаах кыттааччылар» анал аат кыайыылаахтара, игирэ эдьиийдии- балыстыы Александра уонна Акулина Андреевналар, сылгы Собуотун уонна олохтоох дьаһалта сыаналаах бэлэхтэринэн наҕараадаланнылар.
Афанасий Томскай, Бастакы Хаҥалас нэһилиэгин баһылыга: «От оттоон, сүөһү ииттэн, төрүт дьарыкпытын тутуһан баччаҕа диэри кэллэхпит. Кистэлэ суох, кэнники оттооһунтан тэйии баар. Биригээдэ күүһүнэн уонна мэхэньисээссийэ сайдан аҕыйах киһи ходуһаҕа киирэн оттуур буолла. Маннык тэрээһиннэри, субуотунньуктары дьону түмэн, элбэхтэ тэрийиэххэ, чуолаан оскуола оҕолорун сыһыарыахха наада дии саныыбын. Бүгүҥҥү тэрээһинтэн көрдөххө, дьон илиинэн оттууру ахтыбыт».
Василий Ноговицын, агрохайысхалаах орто оскуола дириэктэрэ: «Оттооһун, сүөһүнү кыстыгы туоратар, биир сүрүн үгэс буолбут үлэбит. Өс хоһоонугар этиллэринии «Биир күн дьылы аһатар». Кэнники бириэмэҕэ оҕо сайыҥҥы үлэ лааҕыра (ЛТО) умнууга хаалла, ону сөргүтүөхпүтүн баҕарабыт. Бүгүҥҥү субуотунньук улахан көмө буолла. Патриотизм, дойдуга бэриниилээх буолуу хас биирдиибитигэр баар буолан кытынныбыт».
Мария Бубякина — эдэр ыччат түмсүүтүн бэрэстэбиитэлэ: «Эдэр ыччаты, оскуола оҕолорун өйдөбүллэригэр, үлэҕэ уопут ылалларыгар бастаан үгэс буолан кэлбит дьарыкпытын көрдөрүөхпүтүн, бэйэбит холобур буолан билиһиннэриэхпитин наада.
Мария Винокурова, Орто Халыма куораттан ыалдьыт, «Саһарҕа» оҕо уһуйаанын сэбиэдиссэйэ:
«Сүүрбүт-көппүт ходуһабар, тапталлаах Тааллаахпар 10-ча сыл буолан баран үктэнним. Оҕо сааспын санаатым, долгуйдум. Бүгүн күрэххэ аҕам саастаах дьон кыттыбыта олус кэрэхсэбиллээх. Күүлэйгэ кыттыбыппыттан астынным, дуоһуйдум. Тыа сирин дьоно бары патриотическай хааннаах, майгылаах дьон буолабыт диэтэхпинэ сыыспатым буолуо. Маннык тэрээһин салҕанан өрүү сылын аайы ыытылла турарыгар, ыччаппыт көхтөөхтүк кыттарыгар баҕарабын».
Владимир Сухомясов, тыа хаһаайыстыбатын исписэлииһэ: «Күүлэйгэ» кыттыбыт кэрэ аҥардарга махтанабын. Быйыл от үүнүүтэ үчүгэй. Сарсын Тааллаахха оту түүрүүгэ субуотунньук киириэҕэ. Сүөһүбүтүн харыстыахха, этэннэ буолуохха».
Тыа хаһаайыстыбатын сонуннарын билиһиннэрдэ, Өлөөкө Күөллээҕи сылгы Собуотун дириэктэрин эбээһинэһин толорооччу София Куликова.
Ааптар: София Куликова, Мария Бубякина