Кэнники кэмҥэ, оҕону тиһиктээхтик иитиигэ араас бырагыраамалар, бырайыактар үлэлээн, саҥаттан саҥа үктэлгэ тахсарга, араас хайысханы баһылыырга, иитии-үөрэтии эйгэтин ситэрэн-хоторон олоххо киирэр буоллулар.
Бу күннэргэ, Орто Халыма киин куоратыгар үөрэх эйгэтин үлэһиттэрин олунньутааҕы сүбэ мунньахтарын чэрчитинэн оскуола үөрэнээччилэригэр эмиэ саҥа сонун тэрээһиннэр ыытылыннылар.
Ол курдук, Н.И.Шарин аатынан Орто Халыматааҕы орто оскуолаҕа 7 үөрэнээччи «Мин маҥнайгы идэм» бырайыак иитинэн анал эксээмэннэри ситиһиилээхтик туттаран, «Баһаатай» диэн идэни баһылаатылар. Үөрэх саҥа үрдэлигэр тахсыбыттарын туоһулуур дьупулуомнары, үөрэхтээһини салайбыт, С.Ф.Гоголев аатынан Дьокуускайдааҕы педагогическай кэлиэс дириэктэрин солбуйааччы Ньургустаана Иннокентьевна Иванова туттарда. Бу үөрүүлээх сонуну биһигиниин Н. И.Шарин аатынан Орто Халыматааҕы орто оскуола дириэктэрэ Колымана Александровна Слепцова үллэһиннэ:
«Мин маҥнайгы идэм» бырайыак олоххо киирбитэ аҕыйах сыл буолла. Бу сыл өрөспүүбүлүкэ үрдүнэн 15 миэстэ көрүллүбүтүттэн, биһиги улууспутугар быйыл 7 миэстэни көрдүлэр. Онон 7 оҕо, биһиги оскуолабытыттан 5 уонна Өлөөкө-Күөллээҕи агрохайысхалаах орто оскуолаттан 2 оҕо тустаах үөрэҕи ааһан бастакы дьупулуомнарын ыллылар.
Бу докумуоннарынан оҕолор, оҕо сайыҥҥы лааҕырыгар үлэлиир, баһаатайдыыр кэмпитиэнсийэни баһылаатылар. Үөрэхпит эйгэтигэр саҥа сүүрээн киирэригэр көмөлөрүн, сүбэлээх салайыыларын иһин, С. Ф. Гоголев аатынан Дьокуускайдааҕы педагогическай кэлиэс эбии үөрэхтээһинин отделын салайааччытыгар В. В. Габышеваҕа, кэлиэс уопсай үөрэхтээһинин дириэктэрин солбуйааччытыгар Н. И. Ивановаҕа, оҕолорун көҕүлээн өйдөөн-өйөөн үөрэттэрбит төрөппүттэрбитигэр махталбытын, эҕэрдэбит тиэрдэбит»
Ааптар: Саргылана Кокорина