Сылгы Ыытар нэһилиэгэр, «Ай-тал» сынньалаҥ кииҥҥэ, Тыа хаһаайыстыбатын үлэһиттэрин күнүгэр аналлаах «Урукку кэм ахтылҕана…» дьоро киэһэ буолан ааста.
Тэрээһин саҕаланыыта, нэһилиэк туруу үлэһит дьонун туһунан ахтылынна, билигин сүөһүнү иитэр, уруҥ илгэни үрүлүтэр дьоммутугар махтал суруктар туттарыннылар.
Дьоро киэһэҕэ нэһилиэк түөлбэлэрэ «Тиллибит хаартыскалар» диэн сопхуоска үлэлээбит дьон хаартыскаларын тилиннэрэн, инсценировка көрдөрөн, көрөөччүлэргэ ааспыт кэм ахтылҕанын, үлэлээбит кэмнэрин үтүө өйдөбүлүн көҕүттүлэр. Ону тэҥэ уостан түспэт ырыалары ыллаан, кэлбит ыалдьыттарга бэлэх ууннулар.
Тэрээһин үөрүүлээх түгэнинэн киирии билиэтинэн латырыайа оонньонно, манна сынньалаҥ киин үлэһиттэрэ куһу-хааһы, отону, үүтү, тоҥ балыгы оонньоттулар. Онон сүүйбүт дьон илии тутуурдаах, өттүк харалаах буолан, үөрдүлэр-көттүлэр.
Дьоро киэһэ атыы-эргиэн дьаарбаҥкатынан түмүктэннэ, нэһилиэк олохтоохторо бэйэлэрэ үүннэрбит оҕуруот аһыттан оҥоһуллубут араас кэнсиэрбэлэри, үүтү-сүөгэйи, отон, тэллэй арааһын, куобахха тиийэ хамаҕатык атыылаан үп-харчы киллэһиннилэр.
Тыа сирэ туруу үлэһит дьонунан киэн туттар. Үлэлээн ааспыт үтүө дьонун умнубат, махтанар. Сылгы Ыытарбытыгар өссө да хотон муҥунан хороҕор муостаах дэлэйдин, сыһыы муҥунан сыспай сиэллээх элбээтин диэн алҕыыбыт!
Ааптар: Жанна Винокурова
