Сылын аайы Өрөспүүбүлүкэ оскуолаларыттан үөрэххэ, успуорка, тэрээһиннэргэ көхтөөх, үрдүк көрдөрүүлээх оҕолор сүүмэрдэнэн Ил Дархан харыйатыгар кыттыыны ылаллар. Оннук чиэскэ тиксэр, үөрүүлээх сурах быйыл биһиги оскуолабытыттан, миэхэ тосхойбутун олус үөрэ, долгуйа ылыммытым.
Биһиги улууспут нэһилиэктэриттэн, Орто Халыма куоратыттан ахсынньы 21-29 күннэригэр уопсайа 12 оҕо олус үчүгэйдик сылдьан кэллибит. Салайааччынан Хатыҥнаах оскуолатын учуутала, Евдокия Алексеевна Кудрина салайан илдьэ сырытта. Биһигини «Сосновый бор» санаторийга олохтообуттара. Саха сирин 600-чэ үөрэнээччитэ мустан, араас сонун интэриэһинэй, култуурунай тэрээһиннэргэ, о.э. оҕо дыбарыаһыгар, циркаҕа уо. д. а. сылдьан, элбэҕи, сонуну сэргии көрдүбүт. Элбэх оҕону кытта билсистибит, доҕордостубут. Ону таһынан Ил Дархан Айсен Сергеевич Николаев Өрөспүүбүлүкэбит 10 саамай чаҕылхай үөрэнээччилэригэр, бэйэтин наҕараадатын туттарда.
Маннык тэрээһиҥҥэ кыттан, олохпор умнуллубат кэрэ-бэлиэ түгэни ылбыппар, үөрэнэр оскуолам бары үлэһиттэригэр, ийэбэр, салайааччыбытыгар Евдокия Алексеевнаҕа улахан махталбын тиэрдэбин. Оҕолорго үөрэххитин кичэйэн, барыга көхтөөх буолан, үрдүккэ талаһыҥ диэн баҕа санаабын тиэрдэбин.
Ааптар: Антон Антипин, А.Н.Явловскай аатынан Сылгы Ыытар орто оскуолатын 11 -с кылааһын үөрэнээччитэ
Хаартыска: Ил Дархан харыйатын кыттааччылара