Режиссёр Ольга Алексеевна Винокурова ылсан, народнай театр 55 сылыгар көрөөччүлэргэ дьоһун бэлэх оҥордо. Уһулуччу киһибит туһунан биир дойдулаахтара эрэ буолбакка, элбэх киһи билэн, киэҥ эйгэҕэ аата ааттана турарыгар, салгыы араас таһымнаах үлэлэр бара тураллара — биһиги ытык иэспит буолар.
Народнай тыйаатыр бэлиэ күнүнэн эҕэрдэлээн, испэктээк туруоруутунан астыммытын биллэрэн туран, улуус Баһылыгын бастакы солбуйааччыта Пётр Антипин араас таһымнаах наҕараадалары артыыстарбытыгар туттарда.
Кулууп дириэктэрэ Анастасия Павлюк, профессор аймахтарын ааттарыттан Лена Соловьева туруорууга кыттыбыт бар дьоммутугар махталларын биллэрдилэр. Испэктээк көрбүт Александра Явловская санаатын суруйар:
«Ольга Алексеевна сүҥкэн улахан үлэни тэрийбит, 2,5 ыйга элбэх да киһини хамсатан, дириҥ суолталаах Улуу Киһибит олоҕун барытын кэпсиир чаҕылхай испэктээк туруорбут. Браво и брависсимо актердарга. Талааннаах да дьонноох оройуоммут диэн киһи киэн тутта көрөр. Дьүһүйүүнү астына-дуоһуйа көрөн кэллибит. Кыра оҕоттон, эдэр ыччаттан саҕалаан, элбэх да киһини хабан сүдү үлэни режиссёр туруорда»
Ааптар: Светлана Третьякова
Хаартыска: Алёна Кокорина
