Педагог уонна настаабынньык сылыгар, Учуутал күнүгэр анаан Г.Г.Софронов аатынан Өлөөкө-Күөл орто оскуолатыгар араас тэрээһиннэр буола тураллар. Ол курдук, методическай холбоһуктартан настаабынньык уонна эдэр учуутал буолан «Лучший практик наставничества» диэн куонкуруска 5 паара кытынна.
Манна аһаҕас уруок ыытыыта, оҕо сайыҥҥы сынньалаҥын туһалаахтык атаарар бырайыагын оҥорон көмүскээһин уонна оҕолор ыйытыыларыгар сонно хоруй түһүмэхтэр киирдилэр. Дьүүллүүр сүбэ быһаарыытынан, бу куонкурус кыайыылааҕынан математика учууталларын холбоһугуттан кыттыбыт 33-үс сылын учууталлыы сылдьар Созонов Василий Васильевич уонна кини туйаҕын хатарааччы Созонова Екатерина Егоровна буоллулар. «Сатабыллаах учуутал» анал аат хаһаайыннарынан саха тылын учууталлара Ноговицына И.Е. уонна Кривошапкина Нь.С. ааттаннылар. «Бастыҥ уруок» анал ааты алын кылаас учууталлара Никулина С.А. уонна эдэр коллегата Соловьева У.Т. ыллылар. «Бастыҥ бырайыак» анал аатынан физкультура учууталлара Третьяков Д.М. уонна Кривошапкин Е.Э. буоллулар, оттон «Өркөн өй» ааты социальнай-психологическай холбоһуктан Третьякова Э.П. уонна Васильева А.А. ыллылар. Кыайыылаахтар лиэнтэ кэттилэр, добун сурук, сэмэй бэлэх туттулар. Бары кыттыылаахтар өйдөбүнньүк статуэткалары уонна сэмэй бэлэх ыллылар. Бу куонкуруһу оскуола администрацията уонна «Күөрэгэй» олохтоох КЭК тэрийэн ыыттылар.
Учуутал күнүгэр аналлаах эҕэрдэ кэнсиэри оскуола оҕолорун «Аргыс» түмсүүтэ туруорда. Оҕолор сылын ахсын учууталларга араас анал ааттары толкуйдаан соһута үөрдэллэр. Быйыл да анал ааттаах аалай лиэнтэлэри кэтэрдэн учууталларын үөртүлэр.
Үтүө үгэс буолбут «Дублер күнэ» оскуолаҕа быйыл да олус үчүгэйдик ааста. Оҕолор учууталлары солбуйан, учуутал оруолун толорон бэркэ астыннылар. Үөрэнээччилэр «саҥа учууталлары» бэркэ биһирээбиттэр.
Салгыы төрөппүттэр, учууталлар уонна үөрэнээччилэр икки ардыларыгар, 7 көрүҥҥэ илин – кэлин түсүһүүлээх, тыҥааһыннаах спартакиада буола турар. Ол курдук, волейболга эр дьон уонна кэрэ аҥардар хамаандалара оонньоотулар. Икки бөлөх кыайыылааҕынан учууталлар хамаандалара буолла. Салгыы буулдьанан ытыы, шашка, шахмат, хабылык, хаамыска, остуол тенниһэ уонна көрдөөх стартар буолуохтара. Түмүктүүр тэрээһининэн, төрөппүт комитета учууталларга анаан дьоро киэһэни тэрийии былааннанар. Дьэ, маннык бииртэн биир олус интэриэһинэй, олус көхтөөх тэрээһиннэр буола тураллар.
Ааптар: И. Ноговицына, Өлөөкө-Күөл бөһ.
