Ааспыт нэдиэлэҕэ Хатыҥнаахха тыа хаhаайыстыбатын исписэлииһэ Кюннэй Третьякова көҕүлээhининэн, Саха өрөспүүбүлүкэтигэр Үлэ сылынан уонна тыа хаhаайыстыбатын күнүн чэрчитинэн «Тыа сирэ — уйгу төрдө» диэн тэрээһин ыытылынна. Манна олохтоох дьаһалтата, Ф.И.Роббек аатынан сынньалаҥ киин, бибилэтиэкэр Диана Шкулева, «Чэчир» оҕо уhуйаана, Хатыҥнаах орто оскуолатын тэрилтэлэрэ уонна кэтэх хаhаайыстыбалаах дьон биир сомоҕо буолан киэҥ хабааннаах тэрээhиннэри тэрийэн, көхтөөхтүк кытыннылар.
Хатыҥнаах нэhилиэгэр 80 куурусса, 102 ураа муостаах, 51 сыспай сиэллээх иитиллэр. Сүөһүнү 31 ыал ииттэр.
Тэрээһин балаһыанньатын быһыытынан, хаhаайыстыбалаах дьон үс хамаандаҕа арахсан бастыыр иһин араас күрэхтэргэ көхтөөхтүк кыттыннылар.
Орто оскуолаҕа оҕо аймаҕы үлэhит дьону өрө тутууга туhаайар, билиһиннэрэр сыаллаах, кылаас чаастара, алын кылаастарга уруhуй куонкуруһа, улахан кылаастарга викториналар буолбуттара. «Чэчир» оҕо уһуйаанын иитээччитэ Людмила Лаптева «Тыа сирин оҕотобун» хоһоонунан, уһуйаан сэбиэдиссэйэ Мария Винокурова хаартысканан мантаастаан оҥорон үлэ дьонун эҕэрдэлээтилэр.
Тыа хаhаайыстыбатын күннэрин көрсө, көтөр аалынан сибиэhэй ас кэлэн, олохтоохтор үөрүүлэрэ үксээтэ.
Хамаандалар «Көрдөөх пиэрмэр», «Үлэнэн дьолломмут дьоһун дьоммут» хаартыска истиэндэлэри, фотозоналары оҥорууга, «Өбүгэм үлэҕэ туттубут маллара» быыстапкаҕа, бэйэ бородууксуйатын дьаарбаҥкатыгар, «Доҕордоһуу биэчэрэ» күрэстэргэ кытыннылар. Маны сэргэ, кэтэх хаһаайыстыбалаах дьон хотон сыба
ҕар уонна уопсай сылгы хаайыллар күрүөтүн бөҕөргөтүү субуотунньугар көхтөөх кыттыыны ыллылар.
«Көрдөөх пиэрмэр» көрдөөх күрэххэ күүстээх аҥардар булт таҥаhын кэтэн, тыыннан, сыылан, хайыhардаан ыйыллыбыт сиргэ тиийэн балыксыт, хаасчыт, куобахсыт уобараһын көрдөрбүттэрэ, көрөөччү интэриэһин тарта. Бу күрэс саамай саастаах кыттааччытынан Руслан Михайлович Киприянов бэлиэтэннэ.
Быыстапкаҕа Валентина Николаевна Бандерова, Мария Филипповна Третьякова урукку сурунааллары, хаhыаттары, туттуллубут маллары аҕалан көрдөрөн, урукку оҕо саас дьоллоох кэмин санаттылар.
«Үлэнэн дьолломмут дьоһун дьоммут» хаартысканан истиэндэ биэчэри ситэрэн биэрдэ.
Ол курдук, тыа хаhаайыстыбатыгар «ССРС 50 сыла аатынан сопхуос» араас сылларга үлэлээн ааспыт Мария Третьякова, Розалия Дьячкова, Анна Петровна (бэтэринээр), Николай Егорович (булчут)Кудриннар, тырахтарыыс Михаил Егорович Шкулев дьиэ кэргэттэрин уонна Егор Егорович Шкулев сырдык кэриэhигэр аналлаах истиэндэлэр турдулар. Тыа хаһаайыстыбатын исписэлииһин Кюннэй Третьякова туhунан Хатыҥнаах орто оскуолатын үhүс кылааhын үөрэнээччитэ Ангелина Киприянова истиэндэ оҥорон дьон сэҥээриитин ылла. Хатыҥнаах орто оскуолатын учуутала Виктория Кудрина нэhилиэкпитигэр ынах сүөhүнү иитэр дьону хаартыскаҕа түһэрэн оҥорон таhааран, дьон санаатын көтөхтө, дьону, ыччаты үлэҕэ көҕүлээтэ.
Уруhуй куонкуруһун кыайыылааҕынан 2-с кылаас үөрэнээччитэ Дархан Татаринов наҕараадаланна.
«Доҕордоһуу биэчэрэ» куонкуруска хамаанда аайы биирдии ыанньыксыт, биир мүнүүтэ иһигэр ынах ыаһыныгар күрэхтэстэ. Тэрээһин түмүгүнэн, төһө үүт ыаммытынан, хамаанда очукуо ылла. Бу туһунан видеоҕа устан, сынньалаҥ кииҥҥэ көрөөччүлэр дьүүллэригэр таhаардылар. Түмүккэ, Елена Кондакова түргэн-тарҕан туттуулаах бастыҥ ыанньыксытынан бэлиэтэннэ.
Сэппэрээтэр хомуйуу туспа ураты түһүмэх буолан көhүннэ. Көрөөччүлэр сэппэрээтэр хомуллуута сөпкө туттууну эрэйэрин бэлиэтии көрдүлэр. Сэппэрээтэри үс Далбар хомуйбуттарыттан, түргэн туттуулааҕынан Татьяна Лаптева ааттанна.
Куонкурустар түмүктэринэн, I-кы миэстэҕэ – «Өлгөм», II-c миэстэҕэ – «Стахановец», III-c миэстэҕэ – «Байдам» хамаандалар таҕыстылар. Хамаанда чилиэннэрин көҕүлээн кытыннарбыт Александра Белоногова «Дьону түмэр дьоҕурдаах» анал аакка тигистэ.
Биэчэрбит биир бэлиэ үөрүүлээх түгэнинэн, Орто Халыма улууhун тыа хаhаайыстыбатын управлениетын начаалынньыгын аатыттан Татьяна Лаптева Махтал сурук тутта, Саха Өрөспүүбүлүкэтин тыа хаhаайыстыбатын бэтэрээнэ анал аатынан Гаврил Прокопьевич Лаптев бэлиэтэннэ.
«Тыа сирэ — уйгу төрдө» тыа хаhаайыстыбатын нэдиэлэтэ ситиhиилээхтик ааспытынан, Ф.И. Роббек аатынан сынньалаҥ киин, Хатыҥнаах муниципальнай тэриллии кэлэктиибин аатыттан тыа хаһаайыстыбатын исписэлииһигэр Кюннэй Третьяковаҕа, махтал суруктар, анал бириистэр туттарылыннылар.
Биһиги ыҥырыыбытын ылынан, бука бары кыттыбыт хамаандаларга, хамаанданы түмэн салайбыт тыа хаһаайыстыбатын өрө тутар, дьону үлэҕэ көҕүлүүр, холобур буолар дьоммутугар Александра Белоноговаҕа, Людмила Лаптеваҕа, Олимпиада Ефимоваҕа, дьүүллүүр сүбэ чилиэттэригэр Тамара Татариноваҕа, Дария Сивцеваҕа, Алексей Бандеровка, Василий Дьячковка, чуолаан сыана киэргэтиитин ылсан үлэлэспит, биһиги үлэбитин өйүүр, көҕүлүүр киһибитигэр Диана Шкулеваҕа барҕа махтал тылларын тиэрдэбит.
Ааптар: Акулина Сибирякова
