Улуустааҕы тыа хаһаайыстыбатын управлениета иһитиннэрэринэн, улуус үрдүнэн 871 ынах сүөһү (442 ыанньык ынах), 2810 сылгы сүөһү (1366 биэ) саҥа сылга үктэннэ. Бу күннэргэ сүөһү эбии аһылыгар (комбикорм, эбиэс) сайаапка хомуллар.
Үүммүт сылга төрүөх саҕаланна. Ол курдук Иккис Мээтискэ — 1, Бастакы Хаҥаласка — 3, Иккис Хаҥалас нэһилиэгэр 4 төрүөх ылыллыбыт. Ол курдук Эбээххэ, Люция Егоровна Слепцова хаһаайыстыбата саҥа сылы ньирэйдээх көрүстэ. Ороһуоспаҕа Василий Тимофеевич Стручков, эргэ саҥа дьыл күнүгэр Пелагея Дмитриевна Новгородова, Вера Егоровна Винокурова сүөһүлэрэ төрүөх биэрдилэр. Онон Вера Егоровна сүөһүтүн ахсаана 8 төбөҕө тэҥнэстэ (мантан 5 ыанньык), торбоһун сиэннэрэ Ангелочек диэн сүрэхтээбиттэр.
Ааптар: Саргылана Кокорина