Мунньахха аҕа баһылыгы кытта улуустааҕы тыа хаһаайыстыбатын управлениетын начаалынньыга Дмитрий Николаевич Винокуров, нэһилиэнньэ уонна үлэ социальнай көмүскэлин холбоһук киинин салайааччыта Любовь Алексеевна Оконешникова, Орто Халыматааҕы кииннэммит балыыһа бырааһын экэнэмиичэскэй салааҕа солбуйааччыта Любовь Михайловна Кулагина, улуустааҕы үөрэх управлениетын начаалынньыгын солбуйааччы Петр Дьулустанович Васильев, СӨ ОДьКХ Орто Халыматааҕы филиалын дириэктэрэ Александр Васильевич Третьяков кыттыыны ыллылар.
Мунньахха нэһилиэнньэ көхтөөхтүк кытынна. Мунньах кыттыылаахтарын кытта икки аҥаар чаас устата атах тэпсэн олорон, сэргэх кэпсэтиилэр буоллулар.
Улуус баһылыга Иван Лаптев үүммүт сылга олохтоох нэһилиэнньэ көҕүлээһинин өйүүр бырагыраама чэрчитинэн, улуустан успуорт саала өрөмүөннэниэҕэ диэн үөрүүлээх сонуну иһитиннэрдэ.
Араас таһымнаах ыйытыылар, этиниилэр киирдилэр.
Ол курдук олохтоох балыыһа эбийиэгэ хаарбах туруктааҕынан, саҥа тутуу ирдэнэрэ, улахан дьоҥҥо уонна оҕолорго тиис бырааһа, олохтоох ОДьКХ тыгар тиэхиньикэ наадата, сайыҥҥы кэмҥэ эмп-томп аҕалтарыы биир уустук кыһалҕа буолара этилиннэ, бу сылга сайаапканан куурусса аҕалыллыа, сүөһү эбии аһылыгынан, эбиэһинэн, бурдугунан толорду хааччыллыаҕа, орто оскуола үлэһиттэрин күүһүнэн гараас тутулуннаҕына ититии ситимин төлөбүрүгэр көмө көрүллүө дуо? — диэн сүрүн боппуруостарынан буоллулар.
Маны сэргэ олохтоохтор, сэтинньи ыйга быраастар мобильнай биригээдэлэринэн сорох оҕо доруобуйатын көрдөрбөккө хаалбытын туһунан этилиннэ, аҕыйах ахсааннаах дьонноох нэһилиэк оҕолорун толорду көрөллөрүгэр баҕа санаа этилиннэ.
Ыйытыыларга эппиэттэр уонна ырытыылар түмүктэринэн, олунньу ыйыгар күүтүллэр СӨ Бырабыыталыстыбатын отчуотугар, ОДЬКХ тэрилтэтигэр тиэхиньикэ көрүллүүтүн уонна балыыһа тутуутун туруорсарга диэн этиилэр киирдилэр.
Мунньах бүтүүтэ, Үлэ сыла түмүктэммитинэн, баһылык Иван Васильевич олохтоох ДЭС массыныыһыгар Павел Викторович Третьяковка, Хатыҥнаах орто оскуолатын техническай үлэһитигэр Егор Михайлович Сибиряковка Бочуоттаах кырааматалары туттарда.
Түмүккэ улуус баһылыгын отчуотун, олохтоохтор көхтөөхтүк ыытыллыбытынан бэлиэтээтилэр, хамыыһыйаҕа махтал тылларын эттилэр.
Ааптар: Акулина Сибирякова, Хатыҥнаах бөһ.
Хаартыска: Улуус баһылыгын ТГ ханаалыттан уонна Алексей Бандеров түһэриилэрэ