Г.Г.Софронов аатынан Өлөөкө Күөл орто оскуолатын төрөппүтүн кэмитиэтэ урут уруккуттан олус таһаарыылаахтык үлэлиир. Ол үлэтин сырдатан, 2022 сыллаахха улуустааҕы төрөппүт кэмитиэтин үлэтин сыаналыыр куонкурус кыайыылаахтара буолбута. Билигин хаһыс да сылын салайааччынан Софья Константиновна Татаринова бэрт көхтөөхтүк үлэлиир.
Оскуолабытыгар үтүө үгэс буолбут, кэтэһиилээх тэрээһиннэр сылын аайы улахан бырааһынньык курдук ыытыллаллар. Холобурун эттэххэ, балаҕан ыйыгар — «Күһүҥҥү киһи күлбүтүнэн» дьаарбаҥка, алтынньыга— учуутал күнүн көрсө, учууталлар, оҕолор, төрөппүттэр икки ардыларыгар миниспартакиада, сэтинньигэ — Байанай киэһэтин күрэхтэрэ, ахсынньыга — Саҥа Дьыллааҕы бэлэх дьаарбаҥката, тохсунньуга – Саҥа Дьыллааҕы утренник, олунньуга – хапсаҕай күрэҕин успуонсардааһын, кулун тутарга – кыргыттарга күрэхтэһии, муус устарга – хаҥкылыыр катогу арыйыы, ыам ыйыгар – выпускниктар бааллара. Маны барытын төрөппүттэр сүүрэн-көтөн тэрийэн ыыталлар.
Оттон, быйыл Педагог уонна Настаабынньык сылын чэрчитинэн, Учуутал күнүгэр анаан төрөппүттэрбит бэртээхэй киэһэни тэрийдилэр. Мааны астаах сандалы тардан, оскуолаҕа үөрэххэ аналлаах хаартыскаҕа түһэр муннугу киэргэтэн оскуола үлэһиттэрин үөрэ-көтө көрүстүлэр. Бу киэһэ кылаас салайааччыларыгар анаан күрэхтэһии тэрилиннэ. Манна салайааччыларга кылааһын оҕолорун туһунан араас ыйытыктар, хаартысканан сорудахтар о.д.а. тургутуулар бэрилиннилэр. Уопсайа 8 түһүмэҕи ааһан, 7-с кылаас салайааччыта Изабелла Егоровна Ноговицына кыайыылаах аатын ылан, аалай лиэнтэ кэттэ.
Киэһэтин араас көрдөөх оонньуулар, үҥкүү, ыраахтан-чугастан музыкальнай эҕэрдэлэр сүргэбитин көтөҕөн, бириэмэ барбыта биллибэккэ ааста. Маннык түмсүүлээхтик, айымньылаахтык, көхтөөхтүк биир сомоҕо кэриэтэ үлэлии-хамсыы олорор төрөппүттэрбитигэр, салайар кэмитиэккэ махтанабыт. Инникитин да бу үтүө бачыымҥытын ыһыктыбаккытыгар ис сүрэхпититтэн баҕарабыт.
Ааптар: Оскуола салалтата
Фото: Үгэс буолбут тэрээһин кыттыылаахтара / ааптар: Василий Созонов