Ол курдук, сарсыардабыт сахалыы таҥастаах түһүлгэттэн саҕаланна. Сахаларга олунньу ый куту-сүрү бөҕөргөтөр ыраастаныы ыйынан биллэр, онон үөрэнээччилэргэ, учууталларга барыбытыгар төрүт култуура учуутала Мария Юрьевна Третьякова ыраастаныы туомун ыытта.
Салгыы күн үҥкүүтүн — оһуохайы оройуттан туттубут. Минньигэс астаах остолубуойбутуттан сарсыардаттан алаадьы сыта дыргыйда. Уруоктарга киирии, тахсыы чугдаар чуораанын оннугар сахалыы чабырҕах чуопчаарда. Саха тылын уруоктарыгар С.А.Новгородов алпаабытынан дьыктаан суруйдубут.
Оттон киэһэ өттүгэр 5-ис кылаастарга «Ааҕарбын таптыыбын» диэн дьиэ кэргэнинэн ааҕыы улуустааҕы күрэх бастакы, оскуола иһинээҕи түһүмэҕэ буолла. Төрөппүттэр оҕолорунаан кэлэн, саха литературатын төрүттээччилэр айымньыларын аахтылар. Кинилэри дьүүллүү ааспыт сыллар улуустааҕы тэйиччиттэн ыытыллыбыт «Ааҕарбын таптыыбын» күрэх кыайыылаахтара кэллилэр.
Кыайыылаахтарга добун суруктар туттарылыннылар. Оскуолабыт библиотекатын үлэһитэ Третьякова Анжелика Алексеевна С.А.Новгородов туһунан быыстапка тарта.
Оттон сарсын оскуолабытыгар улуустааҕы Х төгүлүн ыытыллар «Винокуровскай ааҕыылар» буолаллар. Онон төрөөбүт тылбытыгар аналлаах тэрээһиннэр салҕанан бара тураллар.
Ааптар: Изабелла Ноговицына