Бу күннэргэ Сиэн Күөл нэһилиэгэр, Халыматааҕы көрдүүр-быыһыыр этэрээт быыһааччыта Иван Бережнов, Орто Халыма дьаһалтатын ыксаллаах быһыы-майгы отделын исписэлииһэ Андрей Бережнов уонна олохтоохтор күүстэринэн, сүппүт киһини көрдүүр үлэ ыытыллар.
Бу күҥҥэ диэри түмүк суох. Санатан эттэххэ, от ыйын 16 күнүгэр, Сиэн Күөл дьаһалтатыгар нэһилиэк олохтооҕуттан В.В.Винокуровтан, 84 саастаах аҕата Николай Иванович Винокуров (1940 сыллаах төрүөх) сайылыыр Көссүүк учаастагар суоҕун туһунан тыллабыр киирбит.
Кини кэпсииринэн, аҕата от ыйын 8 күнүгэр сарсыарда бөһүөлэккэ олорор дьиэтиттэн, учаастакпар бардым диэн тахсыбыт. Уола Виктор от ыйын 16 күнүгэр аҕатын көрсө диэн учаастакка тиийбитэ, Н.И.Винокуров олох да миэстэтигэр кэлбэтэҕэ бигэргэммит. Олохтоох дьаһалтаҕа тыллабыр киирбитин кэннэ, олохтоох нэһилиэнньэ күүһүнэн киһини көрдөөһүн тутатына саҕаламмыта.
От ыйын 19 күнүгэр Ми-8 бөртөлүөтүнэн көрдүүр-быыһыыр этэрээр исписэлиистэрэ үөһээнэн көтөн көрбүттэрэ, түмүк аҕалбатаҕа.
Көрдүүр-быыһыыр эиэрээт быыһааччыта Иван Бережнов:
«Бу күҥҥэ диэри ханнык да түмүккэ кэлэ иликпит. Сүппүт киһи суола да суох. Билигин икки квадракоптеры көтүтэн уонна сатыы сылдьан көрдүүбүт. Олохтоохтор көмөлөрүнэн квадрацикылынан сылдьабыт, түмүк суох», — диэн бүгүҥҥү балаһыанньаны кэпсээтэ.
Көссүүк учаастак бөһүөлэктэн 10 килэмиэтир тэйиэс, киһи сатыы хааман 7-8 чааһынан тиийэр сирэ эбит.