Ыам ыйын 17 күнүгэр «Мичээр» уһуйааҥҥа, быйыл Дьиэ кэргэн сылын чэрчитинэн «Аҕа, ийэ уонна мин — спортивнай дьиэ кэргэн» курэх буолан ааста.
Курэхтэһии сыала-соруга:
Төрөппүтү, оҕону чөл олоххо угуйуу, эт-сиин өттүнэн доруобуйаны бөҕөргөтүү, дьиэ кэргэн сыһыанын успорт өттүгэр интэриэс тардыы.
Күрэххэ уопсайа 6 дьиэ кэргэн күөн көрүстэ. Күрэх үөрүүлээх аһыллыыта Дьиэ кэргэн сылыгар аналлаах былааҕы көтөҕүүттэн саҕаланна, уһуйаан салайааччыта Дария Дмитриевна Антипина эҕэрдэ тыл эттэ.
Күрэхпит уопсайа 10 түһүмэхтэн ыытылынна.Дьиэ кэргэттэрбит бары олус бэлэмнээхтэрин, сымсаларын көрдөрдүлэр.
Олус тыҥааһыннаах күэхтэһии кэнниттэн маннык түмүк таҕыста:
1-кы миэстэ — Явловская Катя дьиэ кэргэнэ ылан кыайыы кубогын көтөхтө, 2-с миэстэ Бандеров Эрсан дьиэ кэргэнэ, 3-с миэстэ Аргунов Альтаир дьиэ кэргэнэ ыланнар үөрдүлэр-көттүлэр.
Маны таһынан анал ааттар олохтоннулар: «Иллээх дьиэ кэргэн» Стручкова Ильяна дьиэ кэргэнэ,
«Тургэн, сымса дьиэ кэргэн» — Третьяков Савва дьиэ кэргэнэ, «Кыайыыга дьулуурун иһин» — Халабышев Ваня дьиэ кэргэнэ ыллылар уонна Аргунов Альтаир дьиэ кэргэнигэр «Көрөөччү биһирэбилэ» анал аат туттарылынна.
Кыайыылаахтар бары анал кырааматаларынан, мэтээллэринэн наҕараадаланнылар, сыаналаах бэлэхтэри тутан, үөрүү-көтүү аргыстанан, дуоһуйа сынньанан бардылар.
Күрэхпитин ыытарга күүс-көмө буолбут физкультура учууталларыгар А.Н. Слепцовка, АА Колесоваҕа, бары кыттааччыларга, успуонсардаан күрэхпитин өйөөбүт тэрилтэлэргэ барҕа махталбытын тиэрдэбит.
Дьиэ кэргэҥҥит дьол уйата буоллун, ил-эйэ олохтоннун, баай-дуол тосхойдун!
«Мичээр» оҕо уһуйаанын иитээччитэ Анна Третьякова, Сыбаатай бөһ.