СӨ тутууга миниистирэ В.Д.Романов салалталаах бастакы бөлөх үлэтин нэһилиэнньэни кытары биирдиилээн кэпсэтиинэн саҕалаата.
Үһүс сылын Орто Халымаҕа куратордыыр Виктор Дмитриевич мунньахха өрөспүүбүлүкэ сыллааҕы үлэтин, ситиһиилэрин, 2024 сыл былааннарын сиһилии кэпсээтэ. Мунньахха 20-чэ киһи кыттыыны ылла.
Нэһилиэнньэ тутаах долгутар боппуруостара: үөрэх эйгэтигэр оскуола хапытаалынай өрөмүөнэ, «Кэскил» оҕо саадын сайдар киинигэр оонньуур былаһаакка тутуута; успуорт саала уонна элбэх хабааннаах киини тутуу; авиабилиэт сыаната; сибиэһэй аһынан-таҥаһынан хааччыйыы; нефтебаза тэрилтэ үлэтин эрэсиимигэр, ону тэҥэ нэһилиэнньэ ахсаана аҕыйааһыныгар дьон-сэргэ этиниитэ туһаайылынна.
Отчуот түмүгүнэн, В.Д.Романов нэһилиэнньэ санаатын истэн, тустаах этиниилэр сүнньүнэн үлэ ыытылларыгар туһааннаах министиэристибэлэргэ тиэрдэн, үлэ хаамыытын хонтуруолга ыларын иһитиннэрдэ.
Түмүккэ, СӨ Тыатын хаһаайыстыбатын уонна аска-үөлгэ үлэлиир бэлиитикэҕэ салайааччытын солбуйааччы Дмитрий Филиппов СӨ Тыатын хаһаайыстыбатын сайдыытыгар өр сыллаах бэриниилээх үлэтин уонна үтүө кылаатын иһин Мария Григорьевна Шадринаҕа Махтал суругу туттарыыта, мунньах үөрүүлээх түгэнинэн буолла.
Байды нэһилиэгин олохтоохторо отчуоттуур бөлөх үлэтигэр махтаннылар, инникитин туруорсубут боппуруостара үлэҕэ киирэллэригэр эрэнэ хааллылар.
Ааптар: Оксана Слепцова
Хаартыска ааптара: Оксана Слепцова