Манна аан дойду араас муннугуттан оҕолуун улаханныын, эдэрдиин- эмэнниин хас эмэ сүүһүнэн кыттааччы түмүстэ. Ол курдук, аҥардас Казахстантан 90 оҕолоох бөлөх кыттыбыта сөхтөрөр.
Оттон биһиги Сахабыт сириттэн Орто Халыма улууһуттан, I Хаҥалас нэһилиэгин «Талба Хотун» үҥкүү бөлөҕө баран кытынна.
Бөлөх алта киһи састааптаах баран «Северное сияние» уонна «Далбар Хотун» диэн икки үҥкүү толордо. Төһө да көтөр аалтан сонно түһээт кытынналлар, биһиги далбардарбыт бэрт ситиһиилээхтик кыттан, үкҥүүлэрэ иккиэн l- кы истиэпэннээх Лауреат үрдүк аатын ыллылар.
Маны таһынан, талааннаах тарбахтаахтар быыстапка- күрэҕэр кыттан, кылааннаах кыл-сиэл оҥоһуктардаах В.И. Винокурова күрэх муҥутуур кыайыылааҕа, оттон оҕуруо, сил-кыл оҥоһуктардаах О.П. Винокурова, баайыынан үлүһүйэр С.А. Никулина, Сухомясова Е.С., сиэл сапсыыкалаах Е.П. Тимофеева Лауреат l, ll, lll истиэпэннэринэн наҕараадаланнылар.
Онон алтыа буолан кыттан сэттэ кубоктаах, анал добун суруктаах, үөрүү-көтүү аргыстаах кэлэллэрин долгуйа күүтэбит. Үҥкүүһүттэрбит үгүстэрэ 60- ын ааспыт эйэҕэс эбэлэр да буоллар, Казахстааҥҥа диэри ыраах айаны тулуйан, 37 куйааһы уйан, 40-чалаах эдэрдэрдиин тэҥҥэ күрэхтэһэн кыайыы көтөллөнөн, ситиһии ситиилэнэн төрөөбүт түөлбэлэрин, улуустарын, өрөспүүбүлүкэлэрин кимтэн да, хантан да өйөбүлэ суох соҕотохтуу ааттаппыттарынан киэн туттабыт.
Ааптар: Изабелла Ноговицына, Орто Халыма Өлөөкө-Күөл б.