Орто Халыматааҕы баһаары утары сулууспа иһитиннэрэринэн, үс нэдиэлэлээх «Олорор дьиэ» эпэрээссийэ түмүгүнэн, автономнай баһаары утары сэрэтэр тэрил (АДПИ) элбэх оҕолоох 31 ыалга туруорулунна.
Онон Орто Халыма куоратыгар кэмнээх былаан 100% туолбут. Бу курдук тустаах үлэ соҕотох олорор биэнсийэлээх уонна доруобуйаларынан хааччахтаах дьон дьиэлэригэр туруоруллуоҕа. Тэриллэринэн хааччыллыыны Орто Халыма куоратын дьаһалтата өйүүр.
Нэһилиэктэргэ тустаах хамсааһын олохтоох дьаһалталар хонтуруолларынан ыытыллар. Ол курдук Березовкаҕа, Сылгы Ыытарга уонна Сыбаатайга былаан 100% туолан турар. Өлөөкө Күөлүгэр — 38%, Арҕахтаахха — 25%, Налимскайга — 11%, Ойуһардаахха — 59%, Хатыҥнаахха — 34%, Эбээххэ — 51% оҥоһуллубут. Бу сылга маннык тэриллэри туруоруу соругунан 114 250 00 үп көрүллүбүтүттэн 102 250 00 туһаныллыбыт.
Сыл бүтүүтэ олохтоох дьаһалталар үлэ барылын тустаах уорганнарга отчуоттуохтара. Бу туһунан Орто Халыматааҕы баһаарынай чаас сэрэтэр үлэҕэ инструктора Надежда Щербакова иһитиннэрдэ.
Саргылана Кокорина