Орто Халыма куоратыгар оҕо дьарыктаах буолуутун хааччыйар 3 лааҕыр (улуус гимназиятын, «Боотур» оҕо спортивнай оскуолатын, Орто Халыматааҕы орто оскуола тэрилтэтин иһинэн тэриллибит лааҕырдар) үлэлээтэ.
Сиэн Күөл нэһилиэгэр «Күнчээн» лааҕырга оҕолор араас оҥоһуктары оҥорор албастарга уһуйуллубуттар, «Родничок» лааҕыр оҕолоро сири астыыллар, оҕуруот аһын үүннэрэллэр. Маны сэргэ көҥүл тустуу лааҕыра, от оттуур биригээдэ арыллыбыт.
Манна 70 кэриҥэ оҕо дьарыктаах буолуунан хабыллыахтаах. Өлөөкө Күөлүгэр агрохайысхалаах орто оскуола иһинэн арыллыбыт лааҕыр иитиллээччилэрэ бурдук аһын астаан, «Ньээм-ньээм» эмтээх оттон мүөтү оҥорон атыылыыллар.
Сыбаатайга уол оҕолорго аналлаах «Күнчээн» спортивнай үлэ лааҕыра үлэлээбитэ. Манна олохтоох бибилэтиэкэни кытта ыкса ситимнээх элбэх үлэ ыытыллыбыт. Байды нэһилиэгэр военно-патриотическай хайысхалаах «Звезда» лааҕыр үлэлээбит. Манна 27 оҕо сылдьыбыт.
Сылгы Ыытарга «Здоровячок» доруобуйаны бөҕөргөтөр уонна үлэнэн хааччыйар лааҕырга 25 иитиллээччи дьарыктанар. Арҕахтаах оҕону сынньатар уонна үлэлэтэр лааҕырыгар 25 оҕо араас таһымнаах үлэни толорор, бэтэрээннэргэ көмөлөһөр.
Эбээххэ «Росток» лааҕырга 19 оҕо тэпилииссэ үүнээйитин харайда, ону сэргэ аныгы технология «3Д» моделированиеҕа үөрэннилэр.
Хатыҥнаах оскуолатын былаанынан оҕолорго үлэ лааҕыра арыллара былааннанар. Онон оҕолор тыа хаһаайыстыбатын сайдыытыгар төһүү күүс буолуохтара.
Ааптар: Саргылана Кокорина