Мунньахха этиллибит тыын боппуруостар СӨ Бырабыыталыстыбатын иннигэр туруохтара

Улуус баһылыга ыраах сытар нэһилиэктэргэ отчуоттуур мунньаҕын Сыбаатай нэһилиэгинэн түмүктээтэ. Баһылык бөлөҕө нэһилиэктэргэ сырыытын биһиги уопсастыбанай кэрэспэдьиэннэрбит Сылгы Ыытарга Елена Лаптева, Ойуһардаахха Евдокия Винокурова, Эбээххэ Людмила Никитина, Сыбаатайга баһылык солбуйааччыта Николай Колесов, Арҕахтаахха олохтоох дьаһалта исписэлииһэ Ньургуйаана Винокурова иһитиннэрдилэр.

Бастакы Мээтис

Сылгы Ыытарга сүрүн кэпсэтии тыа хаһаайыстыбатын тула ыытылынна. Олохтоохтор тыа хаһаайыстыбатын сайыннаран дохуоду эргинии, кэтэх хаһаайыстыбалаах уонна саппаас оту оттуур дьон уматыгын ороскуотугар, сүөһү эбии аһылыгар көмө көрүллүү, тыа хаһаайыстыбатын бырагырааматынан дьиэ туттар дьоҥҥо төһө кубуота көрүллэрин, бөһүөлэк уһук олорор дьоҥҥо ититии ситимэ киирэ илигин этиннилэр.

Олохтоох ОДьКХ тэрилтэтин тиэхиньикэнэн хааччыйыыны СӨ бырабыыталыстыбатын мунньаҕар туруоруохха сөп диэн этии киирдэ.
Маны сэргэ тулаайах оҕолору дьиэнэн хааччыйыы боппуруоһа киирдэ, улууска бэриллибит оптуобус ханнык маршрутунан үлэлиэҕин ыйыттылар.

Бары боппуруоска хоруй этилиннэ, кыаллыах кыһалҕаны туоратарга үлэ ыытыллыа диэн түмүккэ кэллилэр. Үөрүүлээх быһыыга майгыга аҕа баһылык Александр Иванович Оконешниковка туйгун бэлиэтин, Вера Семеновна Тарасоваҕа «Гражданскай килбиэн», «Муниципальнай сулууспа туйгуна» Ирина Владимировна Колесоваҕа, «Улуус сайдыытын туһугар кылаатын иһин» Татьяна Николаевна Винокуроваҕа туттарда.

Бочуоттаах кырааматанан Николай Иванович Волков, Спиридон Афанасьевич Тарасов, Владимир Владимирович Колесов, «Үөрэхтээһин сайдыытыгар кылаатын иһин Татьяна Дмитриевна Березкина наҕараадаланнылар. «Үлэ бэтэрээнэ» дастабырыанньа Анна Николаевна Березкинаҕа, Мария Семеновна Лаптеваҕа, Александра Вдадирировна Кокоринаҕа туттарылынна.

Сиэн Күөлэ

Ойуһардаахха бу курдук хабааннаах тыа хаһаайыстыбатын боппуруоһун тула кэпсэтии барда. Маны сэргэ электростанция тутуута, тиис бырааһа наадата этилиннэ. Сүрүн болҕомто, быйыл С.Н.Горохов аатынан оскуола төрүттэммитэ 100 сыллаах үбүлүөйүгэр аналлаах кинигэ бэчээккэ тахсарыгар улуус дьаһалтатыттан көмө үп ыйыттылар.

Алаһыай

Арҕахтаахха араас таһымнаах боппуруос турда. Ол курдук, түүлээҕи (андаатары) туттарыы, интэриниэт автоволоконнай ситимэ, саппаас от тиэллиитэ, дьоҕус көтөр аал уо.д.а. боппуруостар этилиннилэр. Маны сэргэ саа көҥүлүн биэрэр быраастар тоҕо суол-иис баар кэмигэр нэһилиэктэри хабан үлэлээбэттэрий диэн доруобуйа харыстабылын салаатыгар этинии киирдэ.

Баһылык дириҥ суолталаах боппуруостар киирбиттэрин бэлиэтээтэ, быһаарыллыах боппуруостарга үлэ ыытыллыа диэн хоруйдаата.
Үөрүүлээх быһыыга-майгыга Бочуоттаах кырааматанан Мария Ивановна Явловская, Варвара Ивановна Винокурова, Махтал суругунан Надежда Петровна Антипина, Үлэ бэтэрээнинэн Николай Константинович Лаптев, СӨ Бырабыыталыстыбатын кыраамататынан Дьулустан Васильевич Федоров уонна Вадим Дмитриевич Винокуров наҕараадаланнылар.

Иккис Хаҥалас

Эбээххэ баһылык мунньаҕар 50 тахса киһи кыттыыны ылла. Нэһилиэнньэ улууска анал үөрэхтээх каадырынан хааччыллыы таһыма намыһаҕын, холобур, оскуолаҕа, балыыһаҕа анал исписэлиис тиийбэтэ ыйылынна. Тиэллэр чох хаачыстыбата мөлтөҕө этилиннэ. Тыа хаһаайыстыбатыгар, сүөһү аһылыгын тиэйиитин ороскуота, түргэнник ситэр дьиэ кыылын, көтөрүн аҕалыы, сылгы тутар күрүө, ынах сүөһү ииттэргэ хотон тутуутун ороскуотугар көмө үп, убаһа этин атыыга эргинии, сылгы, ынах төбөтүгэр, үүккэ төлөнөр субсидия, уо.д.а элбэх боппуруос киирдэ.

Маны сэргэ улууска авиавокзал тутуута, бөртөлүөт сырыытын кыраапыга эрдэ биллэһиллибэтиттэн, ыраах сытар нэһилиэк олохтоохторо чэпчэтиилээх билиэти ситэри туһаммакка хаалара ыйылынна. Кыра авиация сылдьыа дуо диэн ыйытыылар киирдилэр. Итиэннэ нэһилиэктэн дьону тиэйэр тырааныспар төлөбүрүн ким хонтуруоллуурун ыйыттылар. Олохтоох ыстаансыйа тутуутун боппуруоһа киирдэ. Улууска ыытыллар тэрээһиннэр былааннара эрдэ биллэһиллэн улуус хаһыатыгар кэмигэр тахсарын эттилэр. Оскуола эбийиэгэ эргэтэ, сайыҥҥы лааҕыр, успуорт саалатын өрөмүөнүгэр болҕомто ууралларыгар көрдөһүү киирдэ.

Баһылык хамаандата, этиллибит боппуруостарга харда эппиэт биэрдэ, бу салаалар тула үлэ ыытыллыа диэн эрэннэрдилэр. Маны сэргэ биирдиилээн дьону кытта көрсүү буолла. Мунньах түмүгэр, дьон дохсун ытыс тыаһыгар «Гражданскай килбиэн» бэлиэни Степан Алексеевич Гуляевка туттарылынна. «Успуорт уонна физкультура төрүттэммитэ 100 сыла» бэлиэнэн Юрий Алексеевич Гуляев, Улуус Бочуоттаах кырааматата Людмила Васильевна Карбовскаяҕа, Артем Алексеевич Гуляевка туттарылынна.

Иккис Мээтис

Сыбаатай олохтоохторуттан элбэх боппуруос киирдэ. Онтон тыын боппуруоһунан, оскуола тутуутун үбүлээһинэ уонна каадырынан хааччыллыы буолла.
Маны сэргэ тустаах салалталарга, наҕараадалааһын суолтата сүппэтин туһугар, дьону чиэстииргэ болҕомотолорун ууралларыгар этинии киирдэ. Суол-иис күчүмэҕэйэ, малы-салы тиэйэр ыарахан ыйааһыннаах тиэхиньикэлэр күөл мууһун алдьатан, сэрэхтээх балаһыанньаны үөскэтиэхтэрин сөбө ыйылынна. Сылгыга ыарахан дьыл буолбутун бэлиэтээтилэр. Ыраах сытар нэһилиэктэргэ, суолга-иискэ көмө буолар тиэхиньикэнэн хааччыллыы наадата бэлиэтэннэ. Эмп-томп тиэйиитэ, аҕам саастаах дьон реабилитация ааһар кииннэрин эбийиэгэ тымныытыттан, сынньана барыан баҕалаах дьон хааччахтанара биллэһилиннэ.

Мунньах түмүгэр «Успуорт уонна физкультура төрүттэммитэ 100 сыла» бэлиэнэн Николай Владимирович Тырылгин, Альберт Николаевич Слепцов, «Тыа хаһаайыстыбатын бэтэрээнэ» бэлиэнэн Варвара Васильевна Слепцова, Матрена Иннокентьевна Винокурова, Бочуотунай кырааматанан Тарас Тарасович Гоголев, Марта Дмитриевна Сергеева наҕараадаланнылар.

Баһылык отчуоттуур хамаандатынаан бары нэһилиэк олохтоохторун кытта көрсөн, кэпсэтэн, тыын боппуруостарын тула дьүүллэһэн, нэһилиэнньэ олоҕун-дьаһаҕын кытта билсэн, сэргэх сэһэргэһиилэр олохтоннулар. Улуус дьаһалтатын састааба, боротокуолга киирбит боппуруостары сүүмэрдээн, бу күннэргэ СӨ Бырабыыталыстыбатын отчуоттуур мунньаҕын болҕмототугар туһаайыахтара.

Ааптар: Саргылана Кокорина

Читайте дальше