Кулун тутар 12 күнүттэн Орто Халыма улууһугар, СӨ култууратын уонна духуобунай сайдыы миниистирэ Афанасий Иванович Ноев үлэлиир.
Афанасий Иванович былаан быһыытынан, Орто Халыма улууһун култуура үлэһиттэрин уонна үлэ тэрилтэлэрин салайааччыларын кытта көрүстэ.
«Саһарҕа» оҕо уһуйааныгар иитиллээччилэри, «Родина» успуорт уораҕайыгар ыччаты кытта көрсөн эҕэрдэтин тиэртэ, кэнчээри ыччат кэлэр кэм, үүнэр үйэ кэскилэ, үүнүү-сайдыы тирэҕэ диэн бэлиэтээтэ, бу курдук көхтөөх, актыбыыс, успуорду, култуураны өрө тутар ыччаттар буола улаатыҥ диэн алгыһын, эҕэрдэтин тиэртэ.
Маны сэргэ Афанасий Иванович «Кулума» култуура киинигэр Халыма талааннаах дьонун-ыччатын, ансаамбылларын толорууларынан кэнсиэри көрдө, култуура таһымын сыаналаата.
Култуура миниистирэ сырыылаах үлэтин сарсын Иккис Хаҥалас нэһилиэгэр салҕыаҕа, тус былаанынан Үйэ сааһын бэлиэтиир ытык кырдьаҕаһы Матрена Ильинична Гуляеваны эҕэрдэлиэҕэ. Бастакы Хаҥалас нэһилиэгэр улууска соҕотох Халыма тиибин иитэр Өлөөкө Күөллээҕи сылгы Собуотун олоҕун-дьаһаҕын кытта билсиэҕэ итиэннэ нэһилиэнньэни кытта көрсүөҕэ.
Бу курдук улууска култуура уонна духуобунай сайдыы боппуруостарын, 2029 сыллаахха былааҥҥа киирбит Олоҥхо Ыһыаҕын тула төгүрүк остуоллар, дьыалабыай кэпсэтиилэр ыытыллыахтара.
Миниистир сырыытын туһунан сиһилии «Халыма долгуннара» хаһыат кэлэр нүөмэригэр ааҕыаххыт.
Ааптар: Саргылана Кокорина
