Тохсунньу 26-27 күннэригэр Сылгы Ыытарга Саха сирин успуордун маастара, көҥүл тустууга СССР успуордун маастара Захар Николаевич Чукров сырдык кэриэһигэр, үөрэнээччилэргэ региональнай тустуу күрэҕэ XVIII-с төгүлүн ыытылынна.
Күрэххэ уопсайа 9 хамаанда, Арҕахтаах, Налимскай, Эбээх, Өлөөкө Күөл, Сыбаатай, Орто Халыма, Ойуһардаах, Сылгы Ыытар уонна Аллараа Халыма Андрюшкино сэлиэнньэтиттэн 113 оҕо кыттыыны ылла.
Икки күннээх тыҥааһыннаах киирсии түмүгүнэн, I-кы миэстэ олохтоох оскуола хамаандата (тириэньэр П.Е.Лаптев) II-кэ Өлөөкө Күөл (Д.М.Третьяков), III-с миэстэ Орто Халыма оҕо спортивнай оскуолатын (тир. С.Г.Ефимов, В.П.Степанов) хамаандалара тахсан үөрүүлэрэ үксээтэ.
Иккис күн, киһи барыта кэтэһэр, сэргиир халбас харата хапсаҕай буолбута. Саала иһэ ыалдьааччылар хаһыыларынан доргуйан олордо. Эр-биир киирсии кэннэ түмүккэ муҥутуур кыайыылаахтарынан, 30 киилэҕэ — Вова Сухомясов (Өлөөкө Күөлэ), 41к. —Алеша Татаев (Андрюшкино), 41 — Вова Бандеров (Ойуһардаах) кыайыы өрөгөйүн биллилэр уонна Н.З.Чукров илиититтэн 10 000 тыһ. уу харчынан бириэмийэ туттулар. Ону таһынан судьуйалар быһаарыыларынан 4 анал номинация туттарылынна: «Кэскиллээх бөҕөс» — Савелий Шахов (Сылгы Ыытар), «Кыайыыга дьулуурун иһин» — Родион Вырдылин (Андрюшкино), «Бастыҥ тиэхиньикэтин иһин» Тимур Кокорин (Орто Халыма), «Бастыҥ бөҕөс» Вова Сухомясов (Өлөөкө Күөлэ) өйдөбүнньүк кубоктары, кырааматаны ыллылар. Тустааччыларга анаан Чукровтартан, Айтал уонна Айсен Кокориннартан 5000 — тии тыһынчалаах уу харчынан, тириэньэрдэргэ анал бириистээх лоторея ыытыллан, бааттаах хаһаайыннарын булан, үөрүүлэрин үксэттэ. Бу күрэххэ спонсордаабыт тэрилтэлэргэ, биирдиилээн дьоҥҥо, спортсменнарга, ыалдьыттары түһэриммит, күүс-көмө буолбут нэһилиэк олохтоохторугар барҕа махталбытын тиэрдэбит. Дьоллоох-соргулаах буолуҥ!
Ааптар: Елена Лаптева, Сылгы Ыытар бөһ.
Хаартыска: Хамаанданан турнир бастыҥнара