РСФСР чөмпүйэнээтин призерун, ЯАССР Хотугулуу-Илиҥҥи, Халыма Индигиирдээҕи уонна өрөспүүбүлүкэ элбэх төгүллээх чөмпүйүөнүн Николай Егорович Горохов аатынан күрэххэ, 9 хамаанданан 118 спортсмен кытынна.
Турнир түмүгүнэн бэртээхтэр мэтээл кэттилэр, кырааматанан наҕараадаланнылар. Бастыҥ көрдөрүүлээх оҕолор анал номинациянан биһирэннилэр: И.Д.Оконешников аатыгар «Юный борец» — Ваня Третьяков (Налимскай); Р.В.Оконешников аатыгар «Открытие турнира» — Коля-Ангел Винокуров (Өлөөкө Күөлэ); Г.В.Оконешников аатыгар «За множество чистых побед» номинацияҕа — Сергей Лаптев (Ойуһардаах); И.И.Дьячков аатыгар «За волю к победе» — Роберт Оконешников (Орто Халыма к.); В.М.Тарасов кэриэһигэр «За лучшую технику» анал аакка Володя Оконешников (Арҕахтаах); Н.А. Агапов аатыгар «За красивый бросок» аат хаһаайына — Коля Винокуров (Орто Халыма к.) буоллулар.
Хапсаҕай муҥутуур кыайыылаахтара: алын кылаастарга (успуонсар А.Д.Жирков) — Стас Слепцов, 4 кыл. (Сылгы Ыытар); 48 киилэҕэ диэри, (успуонсар Д.А.Тарабукин) — Айхал Кондаков (Налимскай); 48-тан үөһээ (успуонсар Е.П. Шкулев) — Саша Бандеров (Ойуһардаах). Маны сэргэ Өлөөкө Күөлүн оскуолатын тириэньэригэр Д.М.Третьяковка оскуола дириэктэрин В.В.Ноговицын аатыттан, Ойуһардаах бөҕөһүгэр Стас Бандеровка Гороховтар дьиэ кэргэттэрин ааттарыттан, Өлөөкө Күөлэ тустуугар Айсен Слепцовка И.Б.Винокуров аатыттан 5000 солк суумалаах анал бириистэр туттарылыннылар.
Турнир түмүгүнэн, хамаанданан, III-с миэстэ Сылгы Ыытар, II — Орто Халыма к., кыайыылаах Кубогун Ойуһардаах оскуолата хааллаһынна.
Н.Е.Горохов аатынан көҥүл тустуу турнира успуонсардаах, өйөөччүлээх буолан, сылын аайы киэҥ далааһыннаахтык тэриллэр.
Маны сэргэ хаардаах, тыаллаах күн-дьыл айан суолун тибэн, С.Н.Горохов аатынан орто оскуола бырагырааматынан, оҕолорго билсиһии киэһэлэрэ, дуобат, мини-футбол, көрдөөх күрэхтэр, МЕДИА киинэ, ойуулук көрүү, уо.д.а.тэрээһиннэр ыытыллаллар.
Быйылгы күрэхпит тэрээһиннээхтик ыытыллыбытынан, Ойуһардаах орто оскуолатын кэлэктиибигэр, нэһилиэк олохтоохторугар, бары успуонсардарга, тэрилтэлэргэ истиҥ махталбытын биллэрэбит. Барыгытыгар доруобуйаны, дьолу-соргуну, үлэҕитигэр-үөрэххитигэр таһаарыылаах ситиһиини баҕарабыт. Кэскиллээх спортсмен үксүү, сайда турдун!
Ааптар: Н.Е.Горохов оҕолоро, кинилэр дьиэ кэргэттэрэ
Хаартыска: Турнир хамаанданан кыайыылаахтара