Орто Халыма куоратыгар, У.А.Винокурова аатынан улуустааҕы кииннэммит бибилэтиэкэҕэ, Дойдуга Дьиэ кэргэн, СӨ Оҕо саас сылыгар уонна Ийэ күнүгэр аналлаах «Ийэ баар бу сиргэ Аан дойду аанньала» Дьиэ кэргэнинэн, ол эбэтэр оҕо ийэтинээн кыттар күрэҕэ буолан ааста.
Уопсайа 5 дьиэ кэргэн, Корякиннар, Кокориннар, Кривошапкиннар, Шаповаловтар, Оконешниковтар кытыннылар. Дьүүллүүр сүбэҕэ, эмдэй- сэмдэй уоллаах кыыстаах күн күбэй ийэ, «Аргыскредит» тэрилтэ сүрүннүүр исписэлииһэ Сахая Винокурова уонна элбэх оҕолоох дьиэ кэргэн күндү ийэтэ, «Мой бизнес» тэрилтэ салайааччыта Алена Лаптева үлэлээтилэр.
Бастакы түһүмэххэ күрэхтэһээччилэр бэйэ айан оҥорон аҕалбыт оонньуурдарын көмүскээтилэр. Манна бука бары киһи сөҕөр-махтайар оонньууларын оҥорон аҕалбыттарын көрөн олус үөрдүбүт. Дьиэҕэ, тэрилтэлэргэ, оҕону уһуйууга, сайыннарыыга бэрт оонньуулар диэн бэлиэтээтибит уонна оонньуулары киэҥ араҥаҕа тарҕатыахха диэн этии киллэрдибит.
Бу курдук кыттааччылар өс хоһооннору сааһылаан сөптөөх хоруйдары буллулар, ырыалары, олохтоох ааптардар хоһооннорун, айымньыларын, таабырыннары, сахалыы киинэлэри таайдылар. Ийэ оҕотун, оҕо ийэтин, бэйэ бэйэлэрин төһө билэр эбиттэрин тургутан көрдүлэр, дьиэ кэргэн бэлиэтин уруһуйдаатылар.
Күрэс түмүгүнэн, «Тобуллаҕас толкуйдаах дьиэ кэргэн» — Шаповаловтар дьиэ кэргэн Екатерина, кыыһа Лилианалыын ааттаннылар, «Айар куттаах дьиэ кэргэн» — Александра Кривошапкина, кыыһынаан Мариялыын, саамай кырачаан кыттааччы Имана Корякина, ийэтинээн Галиналыын «Ырыа кынаттаах дьиэ кэргэн» аакка тигистилэр. Варвара Оконешникова кыыһынаан Ванессалыын «Билии биһигэ» номинация ыллылар. Күрэх кыайыылаахтарынан, Кокориннар дьиэ кэргэттэрэ, Саргылана уолунаан Николайдыын тахсан, «Аргыскредит» тэрилтэ анаабыт сүрүн бирииһинэн «Кухонный комбайн» наҕараадаланнылар. Кыттааччылар бары кииннэммит бибилэтиэкэ аатыттан анал кырааматанан, өйдөбүнньүк бэлэхтэринэн наҕараадаланнылар.
Бу курдук Аан дойдуга дьиэ кэргэн иһигэр өрүү бэйэ бэйэҕэ ыкса сибээс, иһирэх сыһыан, уостубат таптал баар буоллун. Ийэ барахсан дьоло-үөрүүтэ, бу манна сыттаҕа…
Ааптар: Туйаара Кудрина