Орто Халыматааҕы муниципальнай тэриллии дьаһалтатын баһылыгын социальнай эйгэҕэ солбуйар Александра Петровна Явловская СВО-ҕа, ол эбэтэр анал байыаннай дьайыыга улууспутуттан уонна Дьокуускай куоракка олорор биир дойдулаахтарбытыттан уопсайа 77 киһи быһаччы кыттарын туһунан кэпсээтэ. Улуус иһинэн ылан эттэххэ, патриот эр дьоммутугар, өй-санаа өттүнэн көмөлөһөргө уонна араас өйөбүллэри оҥорорго дьон эппиэтинэстээхтик кыттар.
Ол курдук кэлиҥҥи кэмҥэ 8 нэһилиэк олохтоохторо бэйэ аһын-үөлүн бэлэмнээн, уопсайа 51 миэстэни улуус киинигэр ыыппыттар, оттон Орто Халыма куорат дьоно-сэргэтэ көмөҕө аналлаах счекка үп-харчы киллэрбиттэр.
Байыаннай дьайыыга кыттар аҕалаах 4 кырачаан быйыл оскуолаҕа маҥнайгы кылааска үөрэнэ киирбит, оттон орто оскуоланы бүтэрэн 2 ыччат ХИФУ устудьуоннара буолбуттар.
Маны сэргэ буойуттарбыт төрөппүттэригэр уонна дьиэ кэргэттэригэр үгүс болҕомто ууруллар, көмө оҥоһуллар. Холобур дьиэлэри ититэр систиэмэлэри ыраастыырга (промывка) үлэ барбыт, ону тэҥэ оттук маһы хайытан, сааһылаан бэлэмнээбиттэр.
СВО-ҕа сылдьар буойуттарбытыгар биирдиилээн да дьон тус санааларын биллэрэллэр. Ол курдук А.Н.Созонов аатынан оҕо ускуустубатын оскуолатын учуутала, ийэ Евдокия Ивановна Лаптева байыаннай дьайыыларга баар дьоммутугар туһаайан, олохтоох матырыйаалтан араҥаччылыыр, арчылыыр аналлаах «Уол оҕо харысхала» бэлиэни анаан-минээн оҥорбут. Бу иэдээннээх, ураты сэрэхтээх дьайыыга кыттар дьоммут төрөппүттэрэ, кэргэттэрэ, оҕолоро, хаан-уруу аймахтара ханнык турукка сылдьалларын ким баҕарар сэрэйэн өйдүүрэ буолуо диэн эрэниэхпин баҕарабын.
Соторутааҕыта Александра Явловская быһаччы тэрийиитинэн буойуттарбыт ийэлэрэ, эдьиийдэрэ 8 дьахтар уонна 1 аҕа Халыма Эбэбит сүнньүнэн айылҕаҕа тиийэн сынньаннылар. Отуу чэйин иһэн, балык миинин амсайан сэргэхсийдилэр. Ону тэҥэ араас күрэхтэргэ көхтөөхтүк кыттан санааларын сайҕаатылар. Кинилэр Александра Петровнаҕа, дьаһалта исписэлииһигэр Юрий Третьяковка, суудуна хапытааныгар Григорий Щербаҕа, Виктория Лаптеваҕа, Оксана уонна Михаил Слепцовтарга бу кэрэхсэбиллээх айаны- сырыыны, көрсүһүүнү тэрийбиттэригэр махталларын биллэрдилэр.
Боотурдарбыт — хоһуун хотойдорбут кыайыы көтөллөнөн төрөөбүт дойдуларыгар этэҥҥэ эргиллэн кэлэллэригэр алгыспытын аныаҕыҥ!
Акулина Колесова.