Анал тэрээһини «Чэчир» оҕо уһуйаанын сэбиэдиссэйэ Мария Винокурова, иитээччи Вера Лаптева иилээн-саҕалаан ыыттылар.
Куонкуруска түөрт дьиэ кэргэн сэттэ түһүмэххэ кытынна. Ол курдук кэргэнниилэр уостубат таптал тылларын эттилэр, Дьиэ кэргэн гиэрбэтин оҥорон көмүскээтилэр, «Устами младенца» кыра оҕо тылларын быһаардылар,«Ийэ күннээҕи түбүгэ», «Төрөппүккэ махтал», «Романтическай биэчэр» түһүмэхтэр сорудахтарын толорон, көрөөччүлэри бэркэ диэн сэргэхситтилэр.
Маны сэргэ «Ырыа ыллыгыныын бииргэ» караоке ырыаларын ыллаан дьиэрэттилэр . Биэчэргэ көрөөччүлэр да кыттыыта суох хаалбатылар, дьиэ кэргэҥҥэ анаммыт өс хоһооннору таайдылар. Тэрээһини сыана бэтэрээнэ М.И.Сибиряков «Үйэлэргэ аналым» диэн ырыанан киэргэттэ.
Түмүккэ, дьүүллүүр сүбэ быһаарыытынан «Көхтөөх кыттааччы» анал номинациянан 45 сыл бииргэ олорбут дьиэ кэргэҥҥэ Елена Петровна, Руслан Михайлович Киприяновтар ааттаннылар.
Үһүс миэстэҕэ Анна Константиновна, Михаил Барашковтар, иккис Кюннэй Алексеевна, Павел Викторович Третьяковтар таҕыстылар, оттон «Дьиэ кэргэн-2024» кыайыылаахтарынан Людмила Николаевна, Александр Михайлович Куприяновтар дьиэ кэргэттэрэ буоллулар. Маны тэҥэ «Көрөөччү биһирэбилэ» анал ааты Кюннэй Алексеевна, Павел Викторович Третьяковтар сүктүлэр.
Тэрээһини салайан, тэрийэн ыыппыт дьоммутугар М.А.Винокуроваҕа, В.М.Лаптеваҕа, дьүүллүүр сүбэ чилиэттэригэр М.П.Корякинаҕа, А.И. Усовка, баһылыкпытыгар И.С.Белоноговка, куонкуруска кыттыбыт бары дьиэ кэргэттэргэ, күүс-көмө буолбут бар дьоммутугар, көрөөччүлэргэ барҕа махталбытын тиэрдэбит.
Куруук маннык көхтөөх биир сомоҕо буола түмсүүлээх буолуоҕуҥ.
Дьоллоох, үйэлээх Дьиэ кэргэн үксүү-тэнийэ турдун.
Ааптар: Акулина Сибирякова
