Орто Халыма куоратын аннынан Халыма эбэ мууһун кэмигэр алдьатан, уутун этэҥҥэ аһарда. Ол эрэн, эбэ көмүөлүн мууһа бу күҥҥэ диэри кытылга сытара, олохтоохтор да бэлиэтииллэринэн дьикти көстүү буолла.
Оттон Алаһыай эбэ уута ааһар бөһүөлэктэригэр, Арҕахтаахха уонна Сыбаатайга, уу кээмэйин билигин да кэтииллэр. Арҕахтаахха Алаһыай эбэ уутун критическэй таһыма 7м.77см. тэҥнэһэр буоллаҕына, бу күн 5м.64см буолан турар. Уу күннэтэ үрдүүр диэн,
олохтоох дьаһалта анал исписэлииһэ Вадим Винокуров иһитиннэрэр:
«Ханнык да балаһыанньаҕа бэлэммит. Дьону быстах кэмҥэ көһөрөргө 80 киһиэхэ усулуобуйалаах икки эбийиэк бэлэм. Ааспыт сыл уу таһыма 5м56 см. тахсыбатаҕа. Ууну ыраастыыр «Акватэкс» быйыл эбии ылыллыбыта. Уу критическэй кээмэйи аһардаҕына, 10 ыал (26 киһи, мантан 5-һэ оҕо) дьиэтэ эмсэҕэлиир кутталлаах.
Бу күн нэһилиэккэ 69 ынах сүөһүлээхпит, мантан 31 ыанньык ынах. Уу кэлиэх курдук буоллаҕына, ынах сүөһүнү бөһүөлэктэн 7 килэмиэтир тэйиэс баар Лев диэн учаастакка көһөрүөхпүт. Сылгыбыт ахсаана 220 тэҥнэһэн турар. Быйыл сылгыга ыарахан дьыл буолла. Өрт көҥүллэммэт буолан, сир-дойду сытыйда, ото лаҥырда, от хаачыстыбата мөлтөөтө», — диэн санаатын үллэстэр.
Сыбаатайдары бу боппуруос эмиэ долгутар . Бүгүн үрэх уутун таһыма ол эргин, 5м.90см. тэҥнэһэр. Критическэй бэлиэ — 7м.50см. «Ыксаллаах быһыы-майгы буолар түгэнигэр, 167 киһи быстах кэмҥэ олохсуйарыгар үс эбийиэк бэлэм турар. Ас-таҥас, бородуукта саппааска баар. Нэһилиэнньэ иһэр ыраас уунан саппаастаах олорор. Аҕам саастаах дьоҥҥо субуотунньуктар күүстэринэн ыраас муус, уу тиэйиллибитэ», — диэн олохтоох дьаһалта анал исписэлииһэ Сардана Колесова иһитиннэрдэ.