Тохсунньу 4-6 күннэригэр Хатыҥнаахха Киберспорт дьиссипилиинэтигэр- DOTA- 2 улуустааҕы күрэх буолан ааста.Тэрээһин анал байыаннай эпэрээссийэ кыттыылааҕын, биир дойдулаахпыт, РФ «Эр санаа» уордьан, Хатыҥнаах нэһилиэгин Бочуоттаах олохтооҕо, дойдутун туһугар олоҕун толук уурбут Николай Петрович Сибиряков сырдык кэриэһигэр II-c төгүлүн ыытылынна.
Күрэххэ уопсайа 6 хамаанда (Арҕахтаах, Орто Халыма, Хатыҥнаах, иккилии хамаандата) кытынна. Күрэҕи Хатыҥнаах орто оскуолатын эбии үөрэхтээһиҥҥэ педагога Петр Николаевич Татаринов, Николай күн күбэй ийэтэ Дария Николаевна, Петр Петрович Сибиряковтар тэрийэн ыыттылар. Өйдөбүл тэрээһиҥҥэ Николай эбээтэ Варвара Николаевна уонна эдьиийэ Александра Николаевна Бережновалар Орто Халыма куоратыттан кэлэн кыттыыны ыллылар.
Күрэх кыттыылаахтара «Эйэ уонна Кыайыы иһин!» Николай Сибиряков сырдык кэриэһигэр анаммыт стелаҕа кутурҕан мүнүүтэни биллэрдилэр, сибэкки уурдулар. Сынньалаҥ киин саалаҕа көрөөччүлэр экран нөҥүө аһаҕастык көрөн олордулар. Үс күннээх тыҥааһыннаах киирсии кэннэ III-с бочуоттаах миэстэҕэ Руслан Парников хамандыырдаах Орто Халыма куорат «Стёпа и Ко» хамаанда, II-c миэстэҕэ тыҥааһыннаах оонньуу кэннэ Дьулустаан Неустроев хамандыырдаах Орто Халыма «Цирк» хамаандата таҕыста, кыайыылааҕынан Роберт Аргунов хамаандата — Алаһыай сүүмэрдэммит хамаандата ааттанна.
Кыайыылаах хамаандалар анал мэтээллэринэн, кырааматаларынан, харчынан уонна кубогунан наҕараадаланнылар. Бастыҥнарга анал номинациялар бэрилиннилэр: «Лучший саппорт» — Станислав Сухомясов (Арҕахтаах), «Лучший роумер» — Альберт Винокуров (Орто Халыма), «Лучший хардлайнер» — Иннокентий Тырылгин (Арҕахтаах), «Лучший мидер» Никита Лаптев (Хатыҥнаах), «Лучший керри» — Руслан Парников (Орто Халыма) тигистэ. «Лучший капитан» Роберт Аргунов (Алаһыай), «Лучший игрок» — Афанасий Долгунов (Орто Халыма).
Сылаалаах уһун айаны аахсыбакка биһиги ыҥырыыбытын ылынан кэлбит спортсменнарга, суоппардарга, күрэҕи иилээн-саҕалаан тэрийбит Петр Николаевич Татариновка, үс күҥҥэ күүс-көмө буолбут нэһилиэк олохтоохторугар, бары успуонсардарга, сынньалаҥ киин үлэһиттэригэр Сибиряковтар дьиэ кэргэттэрэ истиҥ махтал тылларын эттилэр. Биир дойдулаахпытыгар, дьоруойбутугар Николай Сибиряковка аналлаах тэрээһин тиһигин быспакка сылын аайы ыытыллар буолуоҕа.
Ааптар: Акулина Сибирякова, Хатыҥнаах бөһ.