Муус устар 2 күнүгэр Бастакы Хаҥалас нэһилиэгэр, «Күөрэгэй» култуура киинигэр, Саха АССР үтүөлээх учуутала, РСФСР норуотун үөрэҕириитин туйгуна, Аҕа дойду сэриитин кыттыылааҕа Гавриил Георгиевич Софронов төрөөбүтэ 110 сылыгар аналлаах, улахан дьоҥҥо улуустааҕы дуобат күрэҕэ буолан ааста.
Орто Халыма куоратыттан, Бастакы уонна Иккис Хаҥалас нэһилиэгиттэн уопсайа 24 (10 кэрэ аҥар, 14 эр киһи) дуобатчыт кыттыыны ылла.
Күрэс түмүгүнэн, кыайыылаах мэтээллэрин успуорт маастарын кандидаттара үллэһиннилэр. Ол курдук эр дьоҥҥо боруонса мэтээли Владимир Михайлович Слепцов (Эбээх бөһ.), үрүҥ көмүс мэтээли Василий Владимирович Слепцов (Орто Халыма к.) кэттилэр, кыайыылааҕынан Иван Анисимович Третьяков (Орто Халыма к.) таҕыста.
Кэрэ аҥардарга, III-c м. Туйаара Алексеевна Оконешникова (Эбээх бөһ.), II-c м. Северина Иннокентьевна Жиркова (Эбээх бөһ.), I-кы миэстэҕэ уопуттаах оонньооччу Екатерина Пантелеймоновна Тимофеева тэҥнээҕин булбата.
Маны сэргэ тэрийбит кэмитиэт анал номинациялары анаата: «Аҕам саастаах кыттааччы» — Владимир Дмитриевич Батюшкин (Өлөөкө Күөлэ бөһ.), «Кыайыыга дьулуурун иһин»- Алексей Алексеевич Третьяков (Эбээх бөһ.), «Саамай кыраһыабай комбинация»- Егор Николаевич Стручков (Орто Халыма к.)
Тэрийээччилэр ааттарыттан бирииһи олохтообут, олохтоох дьаһалтаҕа, Г.Г.Софронов аймахтарыгар, нэһилиэк олохтоохторугар, бары кыттааччыларга махталбытын тиэрдэбит.
Ааптар: Мария Третьякова, Өлөөкө Күөлэ
