Үүммүт сыл Дойду үрдүнэн Дьиэ кэргэн, өрөспүүбүлүкэҕэ Оҕо саас сылынан биллэһилиннэ. Нэһилиэнньэ уонна үлэ социальнай көмүскэлин управлениета көҕүлээбит былаанынан, олунньу 3 күнүгэр биһиги нэһилиэкпитигэр, Дьиэ кэргэн уонна Оҕо саас сылларын арыллыытын үтүө тэрээһинэ буолан ааста.
Биэчэргэ аҕа баһылыкпыт Алексей Николаевич Сивцев эҕэрдэ тыл эттэ, дириҥ суолталаах, кэскили түстүүр сыл биллэһиллибитинэн сыаналаата уонна олохтоох дьаһалта исписэлииһигэр «Дьиэ кэргэн», «Чуораанчык» оҕо уһуйааныгар уонна В.А.Местников аатынан Алаһыай орто оскуолатыгар «Оҕо саас» сылын бэлиэлэрин туттарда.
Ол курдук үөрэх тэрилтэлэрэ бэлиэ сыл чэрчитинэн, нэһилиэнньэ иннигэр сыллааҕы былааннарын билиһиннэрдилэр, олохтоох дьаһалта исписэлииһэ дьиэ кэргэҥҥэ, оҕо иитиитигэр сокуоҥҥа киирбит көмө-өйөбүл босуобуйалар, бырагыраамалар тустарынан кэпсээтэ.
Умнуллубат кэрэ түгэнинэн 7 эдэр ыалы, элбэх оҕолоох 18 дьиэ кэргэни, «Ийэ албан аата» мэтээллээх 10 дьоруой Ийэни чиэстээтилэр.
Итиэннэ бэлиэ сыллаах дьиэ кэргэттэри: 57 сыл олох суолун устун бииргэ хаампыт Прасковья Егоровна, Николай Петрович Стручковтары; 55 — Валентина Дмитриевна, Василий Гаврильевич Стручковтары; кыһыл көмүс сыбаайбаларынан Дария Федотовна, Василий Васильевич Кондаковтары; 45 — Лидия Афанасьевна, Алексей Гаврильевич Татариновтары, Пелагея Алексеевна, Сергей Александрович Еремеевтары, Анастасия Дмитриевна Винокурованы уонна Иннокентий Алексеевич Созоновы, Мария Ивановна, Дмитрий Петрович Кокориннары; 40 — Раиса Семеновна, Василий Анатольевич Кривцовтары, Анастасия Дмитриевна, Иннокентий Иннокентьевич Созоновтары; 35 — Мария Николаевна, Мстислав Михайлович Федоровтары, Мария Прокопьевна, Анатолий Игнатьевич Олейниковтары; 30 — Мария Ивановна, Егор Иванович Явловскайдары, Мария Егоровна, Алексей Николаевич Сивцевтары; 25 — Альбина Иннокентьевна, Вадим Дмитриевич Винокуровтары, Мария Васильевна, Алексей Иванович Кондаковтары, Айталина Николаевна, Анатолий Иннокентьевич Тырылгиннары; 20 — Марианна Сергеевна, Михаил Захарович Шадриннары, Саргылана Сергеевна, Гаврил Степанович Винокуровтары 10 сылларынан чиэстээтибит, өйдөбүнньүк бэлэх туттардыбыт.
Маны сэргэ үөрүүлээх быһыыга-майгыга, нэһилиэккэ бастакынан күн сирин көрбүт уолчаан ийэлээх аҕатын , Александра уонна Радмир Березкиннар дьиэ кэргэттэрин эҕэрдэлээтибит.
Дьиэ кэргэн аайы оҕо дьоллоох мичээрэ үксүү турдун.
Ааптар: Анастасия Иванова